أيام فـرحي ..

[أريج الورد]

أيام فـرحي .. و حـــزنـي .. و مــعاناتــي ...


قصة للكاتبه : شوق999




*~*~*~ الجزء الأول ~*~*~*





%% الاربعا 3:30 الظهر %%

بعد يوم شاق جداً في المدرسه و عقب ما اتغدت و خلصت قررت امل تتصل بربيعتها ميثا اللي 24 ساعه وياها ... اتريت فتره الين حد شل التلفون ...

امل: توه الناس؟؟ جان ما رديتي احسن؟؟
ميثا: هدي اعصابج خذتيني بشراع و ميداف ... الناس يسلمون اول ... و بعدين من ساعه مفارجتنج مداج تتولهين عليه؟؟
امل بغيض: اخبرج تراج مصدقه عمرج وايد ...
ميثا: هههههههههه ... تعيبيني و انتي محرجه ... شويه و تظهرين من التلفون تصفعيني ... المهم شخبارج؟؟
امل تنهدت: مللللللللل ...
ميثا: سيري ارقدي و خليني ارقد بعد ... تعباااااانه و مالي بارض اسولف ...
امل: انزين وين بتسيرين اليوم؟؟
ميثا: اممممممممم ... مادري بعدني ما قررت ... بس احتمال اسير مركز البستان ... عرس بنت خالتي عقب شهر و مالي بارض افصّل ...
امل: انزين ماعليه البستان ولا غيره ... يوم بتقررين خبريني من وقت عشان يمديني ازهب ...
ميثا و هي تثاوب: ان شاء الله من عيوني ما طلبتي ...
امل: انزين بخليج الحين سيري ارقدي ... اسمع صوت حد ياي ...
ميثا: بسرعه عن يطبون عليج ... <<<< ما مداها تكمل رمستها بندت عنها امل ...

عفرا: شو بلاج زغتي؟؟
امل: حسبي الله على بليسج ... اتحريتج امايه ...
عفرا: ههههههههههه ... جان زين لو جافتج امايه ... ماقالولج ممنوع تقبضين التلفون اسبوع؟؟ ليش ما تسمعين الرمسه؟؟
امل بضيج: بس بس الله يخليج ... جنج عاد انتي البنت المطيعه ...
عفرا: مب شرات بعض الناس ... على فكره ترى حتى الظهرات ممنوعه ...
امل و هي اتنش من مكانها: عادي ... اقدر ارمس ابويه و بيخليني اظهر غصبن عن الكل ...
عفرا: اموت و اعرف شو عايبنج في هالميثا؟؟
امل: شي ما يخصج ... عن اذنج ...

سارت امل حجرتها ترقد و تمت عفرا في الصاله تطالع التلفزيون ... و عقبها بخمس دقايق دش ابوها ياي من الشركه ... دش سلم و كالعاده سار حجرته على طول بدون ما ينطق بكلمه ... طبعا الكل اتعود ع هالشي و صار شي عادي بالنسبه لهم ...

دش عبدالله حجرته و اتجه صوب الكبت على طول طلعله شنطة سفر صغيره و شوية ثياب ولا صد صوب حرمته اللي يالسه تصفح وحده من مجلات الازياء ...

ليلى بدون نفس: مسافر؟؟
عبدالله: قلتيها بنفسج ... ما يحتاي اقولج ...
ليلى: و نحن متى بنفتك من هالسفرات هذي؟؟
عبدالله: ............................................
ليلى و هي تتأفف: انزين و عيالك بتخليهم يهيتون ع كيفهم لا حسيب ولا رقيب؟؟
عبدالله: عيالي كبار ما يحتاي حد يجابلهم ... و بعدين انتي شو خانتج؟؟ مب امهم؟؟
ليلى بعصبيه: انا خلاص تعبت منهم لو شو اسوي ما يطيعوني ...
عبدالله بعصبيه: اووووه ... تراج حشرتينا بهالسالفه ... عيالج و انتي حره وياهم ...<<<<< و دش الحمام و انتو بكرامه ياخذله دش قبل ما يظهر ...
ليلى بخاطرها: اففففففف منكم ... متى الله يفكني منكم و من بلاويكم ...

عقب نص ساعه بالضبط ظهر عبدالله من البيت... عفرا اللي كانت بعدها في الصاله قالت انه مسافر وبعد ما اهتمت لهالشي بسبب تعودهم عليه ...

*~*~*~~*~*~*

"نصوووور قوم بسك خست رقاد" ...

و هو راقد يتراواله انه حد يوعيه بس بكل بساطه مب متأكد اذا هالشي يصير فعلا ولا انه يحلم ... و فجأه ... ما حس الا بماي بارد ينجب ع ويهه ... و هاييج الساعه فز من نومه ...

ناصر: حسبي الله على بليسك يا عمور ... زين جي خرستنا بالماي؟؟
عمر: ما بغيت تنش؟؟ من الصبح اوعيك و انته راقد في العسل ...
ناصر: و عقب هذا كله بعد تباني اكمل رقاد؟؟
عمر: نش نش ابويه و شل وصاختك وياك ...
ناصر: شقتك و انته مسؤول عنها ... نظفها روحك ...
عمر و هو ظاهر من الشقه: بسير و برد ... خمس دقايق ... ان حصلت الصاله ع حالها ما تطبها مره ثانيه ...
ناصر: انزين سير توكل الله وياك ...

ظهر عمر من الشقه ... اما ناصر اعتدل في يلسته ... الصاله كانت في وضع مزري ... الغراش!! منطره في كل مكان ... و اوراق البته منثوره على كبر الصاله ... شل موبايله اللي كان فارنه ع الغنفه اللي عداله و جاف فيه 33 مس كول ... جيك ع المكالمات و تنهد بضيج ...

ناصر في خاطره: كالعاده ولا حد مفتكر ... وينك يا خالي سعود؟؟ انته الوحيد اللي كنت مهتم فيني ... خلني اطلع احسلي قبل لا يرد عمور و يحشرنا ...

شل غترته من على الغنفه ... حطها على جتفه و ظهر ساير البيت ...

*~*~*~~*~*~*

%% الساعه 7:48 فليل %%

مريم: بعده مغلق ...
شمسه بقلق: اففففف يا ربي وين سار هالولد؟؟
...... : و منو هالولد اللي امأذنج يا ام سالم؟؟

اتفاجأن شمسه و مريم و التفتن صوب مصدر الصوت ... و كانت المفاجأه ...

شمسه و الدموع بعيونها: خالد؟؟ حسبي الله على بليسك استهمينا عليك ... زين تسوي فينا جي؟؟

خالد سار صوب امه و لوى عليها ...

خالد: فديتج الغاليه والله اني ولهت عليج ... اسمحيلي الغاليه حبيت افاجأج ...
شمسه: عنبوه امس مرمسينك ولا خبرتنا؟؟
خالد: ما يصير ... تخترب المفاجأه جي ...
شمسه: الحمدلله ع سلامتك يا وليدي ...
خالد: الله يسلمج من الشر ...

كل هذا و مريم تتريا دورها تسلم على اخوها ...

مريم: يعني بتم لاوي عليها طول اليوم؟؟
خالد: اوه انتي هني؟؟ سمحيلي ما جفتج ... من جفت الغاليه نسيت الدنيا كلها ...
شمسه: فديت روحك ...
مريم و هي توايه اخوها: الحمدلله ع السلامه ... و عقبال ما نجوفك معرس ...
خالد: الله يسلمج من الشر ... ان شاء الله قريب ما طلبتي ...
مريم: مبروك مقدما ...
خالد: هههههههه ... ما صدقت والله ... عيل وين الباقي؟؟
مريم: الحين بزقرهم ...

سارت مريم تزقر خواتها ...

...... : هود هود ...
شمسه: هدا اتفضل ابويه محد غريب ...
محمد: السلام عليكم ...
شمسه + خالد: و عليكم السلام و الرحمه ...
شمسه: حيالله بو جسيم ... اقرب ابويه ...
محمد: قريب طال عمرج ... اوه ... بو الوليد هني؟؟ الحمدلله ع السلامه متى وصلت ...
خالد: الله يسلمك من الشر ... توني واصل والله ...
محمد: مبرووك و عقبال الشهاده العوده ...
خالد: ان شاء الله الله يسمع منك ... اول العرس و بعدين بنفكر في الشهاده العوده ...
محمد: هاه خالوه ولدج شكله معزم ...
شمسه: البنت اللي يباها موجوده و تترياه ... خله يعزم و ان شاء الله كل شي بيصير ...
خالد: لالالالالا خلها تتريا شوي ... بعدني ما عزمت ...

و في الطرف الثاني من الصاله ... في الممر المؤدي من الغرف الى الصاله بالتحديد ... اليازيه و نوف سمعن حس واحد ويا شمسه و خالد فترددن يسيرن الصاله ولا لاء؟؟

مريم: بلاكن واقفات هني؟؟
نوف: منو في الصاله؟؟
مريم: امايه و خالد منو بعد؟؟
اليازيه: لالا اسمع حس واحد غريب ...
مريم باستهزاء عقب ما سمعت صوت محمد و هو يرمس: يالله ... الا هو حمود ولد خالوه سلامه ...
اليازيه بضيج: افففففف ... هذا شو عنده كل يوم راز بويهه و ياي؟؟
مريم: عن السخافه و يالله امشن ...

سارت عنهن مريم الصاله و تمن اليازيه و نوف يتعازمن ...

اليازيه: يالله نوفي سيري انتي قبلي ...
نوف: لا والله؟؟ و انتي ليش ما تسيرين؟؟ انتي العوده انتي اللي لازم ادشين اول ...
اليازيه: يالله عاد و عن المصاخه ... امايه بتنازعنا ...
نوف: اففففف لا حول ولا قوة الا بالله ... يالله امشي وياي ... و دخلي قصتج هاي مافينا ع الحشره ...
اليازيه: كيفي ... خله يموت قهر مب مدخلتنها ...
نوف: انتي اخر شي بيذبحج هالحمود ...
اليازيه: مب كيفه ... يالله امشي خلصينا ...

سارن اليازيه و نوف الصاله سلمن على خالد و يلسو كلهم يسولفون ... اليازيه اول ما دشت الصاله كانت ع ويهها ابتسامه صفراء عرف محمد معناها و هالشي خلاه ينقهر من الخاطر بس ما قال شي احتراما لوجود خالته وياهم ... وعقب يا بو سالم و سالم اخوهم العود و اتفاجأو بوجود خالد و ارتبشو باليمعه و ردت خالد من السفر ...

*~*~*~~*~*~*

" اففففففف هذا وقته بعد يسافر؟؟ " <<<<<< قالتها بكل ضيج ...

عفرا: ياختي حظج ردي شو نسويبج؟؟
امل بتهديد: عفروه ان ما سكتي بهالنعال ع ويهج ...
عفرا: هدي اعصابج ... كل ها عشان طلعه؟؟
امل: مافي حل غير اني اترجا امايه ...
عفرا: حياتي لا اتعبين عمرج ع الفاضي ... وفري التعب و قري في البيت ...
امل: ما يخصني ... بظهر يعني بظهر ...
عفرا: انزين بنجوف ...

ظهرت امل من الحجره و رقعت الباب وراها ... و هي ظاهره من الحجره جافت امها ظاهره من حجرتها لابسه عباتها و ترمس في الموبايل ...

ليلى: خير؟؟ في شي؟؟
امل: سلامتج امايه ... بس كنت ابا اطمن عليج ...
ليلى: قولي شو عندج؟؟
امل بخبث: ماشي ... حرام اطمن على امي الحبيبه؟؟ <<<<<< و سارت لوت عليها ...
ليلى: يا اللوتيه انتي ... انزين بس هديني خليني اظهر ...
امل: ان شاء الله ... بس امايه لا تتأخرين ... بتوله عليج واااايد ...
ليلى: ان شاء الله يصير خير ...

ظهرت ليلى من البيت سايره صوب ربيعتها ناهد اللي كل ما تضيج تسير تيلس عندها ...

امل بوناسه: yessssssssssssssssssssssss

يتها عفرا و هي ظاهره من الحجره ...

عفرا: هاه بشري ... اجوفج مستانسه ...
امل: اكيد بستانس ... اللي يظهر من هالبيت لازم يستانس ...
عفرا: غريبه كيف اقنعتيها؟؟
امل: بكل بساطه ما قلتلها اني بظهر ...
عفرا باستنكار: شووووو؟؟
امل: امايه الحين ظاهره ... اكيد بتسير عند ناهد او منى و ما بترد قبل نص الليل ... و انا بظهر و برد قبلها ولا من شاف ولا من دري ...
عفرا: امول استهدي بالله ... و اذا ردت قبلج شو بتسوين؟؟
امل: لا تخافين ما بترد قبل الـ12 و انا برد قبلها ... عن اذنج ...

سارت امل تخبر ربيعتها ميثا تمر عليها ... وخلت عفرا واقفه روحها مذهوله من اللي تسويه اختها ...

*~*~*~~*~*~*

%% الساعه 9:55 فليل %%

" خلاص برايج ... تصبحين على خير و سلمي على خالد ... يالله فمان الله " <<<< و سكرت التلفون ...

الريم: امايه خالد رد من السفر؟؟
سلامه: هيه امايه ... اليوم واصل ...
الريم: ليش؟؟ احيد اجازتهم ما تكون قبل شهر 5؟؟
سلامه: ولد خالتج شاطر ماشالله عليه ... استعيل بالدراسه عشان يفتك ... و هاذوه نجح و رد ...
الريم: هييه ... و باجر بنسيرلهم؟؟
سلامه: اكيد ... بيسوون عزيمه على ردة خالد ...

...... : خالد رد؟؟

سلامه: بسم الله الرحمن الرحيم ... زيغتينا حسبي الله على بليسج ...
أسما: اوووبس ... سوري ما قصدت ازيغج بس اتفاجأت من الرمسه اللي قلتيها ... صدق خالد رد؟؟
سلامه: هيه ... و باجر خالتج بتسوي عزيمه ع الغدا و كلنا بنسير ...
أسما: و قوم عمي معزومين؟؟
سلامه بضيج: اكيد ... تعرفين بو سالم ما له غنا عن عمج ...

...... : السلام عليكم ...
الكل:و عليكم السلام و الرحمه ...
محمد و هو ييلس حذال امه: شحالها الام؟؟
سلامه: دام الولد بخير الام بخير ...
محمد: عساج دوم ان شاء الله ...
أسما بوناسه: دريت انه خالد رد؟؟
محمد: هيه توني ياي من عندهم ... و تراكم معزومين ع الغدا عندهم باجر ...
سلامه: هيه توها خالتك اتصلت و خبرتني ...
الريم: بسير ارقد ... تصبحون على خير ...
محمد: على وين يا حلو؟؟ ما مدانا نيلس وياج ...
الريم: تعبانه من نشة الصبح ... عن اذنكم ...
أسما بخبث: اذنج معاج ... و لا تنسين تخبرين بنت عمج قبل لا ترقدين ... و قوليلها توصل الخبر لبعض الناس ...
محمد بلهجه حازمه: أسما؟؟
الريم: ..............................

اتغايضت الريم من رمسة أسما ... حقرتها و سارت حجرتها ...


|| في حجرة الريم ||

من سمعت موبايلها يرن ربعت تشله ... و قالت بخاطرها هذي اكيد جليثم تتصل بي ... و طلع شكها في محله ...

الريم: هلا والله ببنت عمي ...
جليثم: اهلين ... وينج من الصبح اتصلبج ما تردين؟؟
الريم: كنت عند امايه في الصاله ...
جليثم: دريتي انه باجر عزيمه ببيت خالتج عشان ييت ولد خالتج من السفر؟؟
الريم: هيه ... خبرتني امايه قبل شوي ...
جليثم: ما يطوفج شي ...
الريم: اكيد ... سيف درى ولا بعده؟؟
جليثم: الله يخليج لا تذكريني ... يحليلك ياخويه ... ما جفتيه كيف اعتفس يوم خبرنا ابويه بردة خالد و انه بو سالم عازمنا ع الغدا باجر ... قلبي عورني عليه ...
الريم: هيه والله ما يستاهل ولد عمي ... بس شو نسوي ...
جليثم اتنهدت: خليها على الله ...

و تمت الريم تسولف ويا جليثم الين الساعه 11 ... لانهن متعودات من يوم هن صغار ما يودرن بعض و اذا قبضن التلفونات مستحيل يسكرن قبل ما تطوف ساعه!! و عقب ما سكرت الريم عن جليثم دشت اتسبحت و رقدت ...

*~*~*~~*~*~*

%% الساعه 10:40 فليل %%

في مركز البستان في دبي بالتحديد ...

البائعه: thank you miss
ميثا: you're welcome
امل: يالله بسرعه مافينا نتأخر ...
ميثا: انزييين ... ما قلتي امج ما ترد قبل الـ12 اشحقه خايفه بعد؟؟
امل: تعرفين بزحمة الشوارع ... مافينا ع الحشره ... اتصلتي بالدريول؟؟
ميثا: هيه هيه ... يالله مشينا ...

و هم ظاهرين من المحل اتفاجأت ميثا من اللي طاف جدامها و هو يرمس في الموبايل و شكله مستعيل ...

ميثا: بلاج بهتي؟؟
امل: هذا مب ابويه؟؟ شو يسوي هني؟؟
ميثا: اللي يسوونه الخلق ... شو بيسوي يعني يبيع حلاوه؟؟
امل: لا بس غريبه اللي اعرفه انه مسافر ...
ميثا: انزين يوم بيرد البيت سإليه ... مب مستعيله الحين؟؟
امل: يالله يالله مشينا ...

*~*~*~~*~*~*

%% الساعه 11:10 فليل %%

" افففففففف ... وين سارت هذي؟؟ "

سمعت صوت باب الصاله ينفتح و التفت صوبه على طول تطالع منو ياي ...

...... : انتي الين الحين ما رقدتي؟؟
عفرا بارتباك: منو؟؟ نصور؟؟
ناصر بعصبيه: نصور ف عينج ...
عفرا: سوري ما قصدت ...

يا ناصر يلس عدالها و طلع له صلب سيجاره من الباكيت و ولعها ...

ناصر: امول وينها عنج؟؟
عفرا بارتباك: هاه؟؟ مــ ... مادري ... يمكن تسبح ...
ناصر و هو يطالعها من طرف عينه: متأكده؟؟
عفرا: هيه متأكده ...
ناصر: عيل ليش زايغه؟؟ قولي امول وين ...
عفرا: قلتلك تسبح ... جان تبا بسير ازقرها لك جان خلصت ...
ناصر و رمسة عفرا مب داشه مخه: يالله بسرعه ...

سارت عفرا على طول حجرة امها و اتصلت على موبايل ميثا ... ردت عليها امل ...

عفرا: توه الناس ... جان ما رديتي احسن؟؟ ردي بسرعه ناصر في البيت و يباج الحين تفهمين شو يعني الحين ...
امل: انزين شوي شوي ع روحج يامّي ... عن تموتين علينا ... الحين واصله البيت ...
عفرا: اقولج ... دشي من الباب الوراني و ع الحجره على طول و يوم بتين الصاله سوي روحج كنتي تسبحين ...
امل: ان شاء الله ... أي اوامر ثانيه؟؟
عفرا: لا بس خلاص ... و بسرعه تعالي عن يفضحنا ...
امل: انزين ... يالله جلبي ويهج ...

ردت امل الصاله و حصلت ناصر يالس مكانه و يجلب في قنوات التلفزيون ...

ناصر: وينها؟؟ ماجوفها يت ...
عفرا: بعدها ما خلصت ... عقب ما تظهر من الحمام بتي ...

و عقب ربع ساعه تقريبا دشت عليهم امل لابسه بجامه و لافه الفوده ع راسها اونها كانت تسبح ...

امل باستهزاء: خير؟؟ بغيت شي؟؟
ناصر: سلامت راسج ... بس لا تراويني شيفتج ...
امل: مالت ... عيل اشحقه زاقرني؟؟
ناصر: كيفي ... يالله جلبي ويهج ...

و شويه الا بدخلة امهم ... ناصر من جافها على طول سوا روحه مندمج ويا الفلم اللي عارضينه في التلفزيون ...
ليلى: السلام عليكم ...
امل + عفرا: و عليكم السلام ...
ليلى: اخيرا شرفت؟؟ ولا البيت مسواي فندق لك و لابوك؟؟
ناصر: يهمج اذا ييت ولا لاء؟؟
ليلى: نصور عن قلة الادب و رمسني باحترام ... انا امك و لي حق عليك ... و بعدين انا كم مره قلتلك لا تدوخ و انت في البيت؟؟
ناصر: الله يخليج لا تبدين بالمحاضرات اللي ما منها فايده ... يوم بتعرفين شو يعني كلمة ام تعالي رمسي ...
ليلى احترق ويهها من رمسة ولدها و حبت تغير السالفه: باجر الغدا ببيت خالتكم شمسه ... اتمنى انك تتكرم و تي ... الناس كلها تسأل عنك ...
ناصر: .......................... <<<<<< بغا يرد عليها بس بعدين تراجع عن تكبر السالفه و تستوي مصيبه ...

*~*~*~~*~*~*

%% الخميس 9:13 الصبح %%

" اخيرا يا اليوم اللي بظهر فيه من هالمكان الكريه ... ماتخيل انه شهرين مرن من دخلت هني ... جني يالس فيه من 20 سنه ... بس الحمدلله ع كل حال ... شهرين من العذاب بسبة المخدر اللعين طافن و ان شاء الله المستقبل جدامي احسن ... اخيراً ارتحت من الهم اللي بسبته دمرت نفسي ... "

...... : استاز ماجد ...
مايد: اتفضل دكتور فؤاد ...
الدكتور: ازيك النهارده؟؟ انشاء الله بخير؟؟
مايد: الحمدلله وايد احسن ... متى اقدر اطلع؟؟
الدكتور: بأي وقت بتحب ... و بما انك حتودعنا النهارده عندي ليك مفاجأه ...

...... : السلام عليكم ...
مايد: و عليكم السلام ... راشد؟؟

ربع مايد صوب اخوه العود راشد و لوى عليه و دمعت عينه من الفرح ... الدكتور فؤاد ظهر عنهم عشان يخليهم ع راحتهم ...

راشد: الحمدلله ع السلامه يا مايد ...
مايد: الله يسلمك من الشر ... الله يسامحكم جي تخلوني شهرين ولا تسألون عني؟؟
راشد: مايد ... مو وقته هالكلام الحين ... نسير البيت اول و بعدين يصير خير ...
مايد باستغراب: البيت؟؟
راشد: هيه نعم البيت ... البيت ما يسوى من دونك ...
مايد: ما تدري اشكثر ولهت على امايه؟؟
راشد: اكيد ... و هي بعد ولهت عليك ... و اكيد بتستانس بشوفتك ...
مايد: يالله عيل نسير ...
راشد: يالله ... بنخلص باقي الاجراءات و بنظهر ...

و عقب ما خلصو من باقي اجراءات الخروج توجهو الى بيت بو راشد على طول ...

راشد يزقر امه بصوت عالي: امااااايه ... امااايه ...
ام راشد و هي يايه من حجرتها متروعه: خير يا ولدي شو بلاك؟؟
راشد: عندي لج مفاجأه ...
ام راشد: رشود تراك روعتني ... قول بسرعه شو عندك؟؟
راشد: لحظه بزقر الريال اللي واقف خاري ...

ظهر راشد من الصاله شوي و رد و وياه مايد ... تم مايد واقف عند الباب يطالع امه و متردد هل يسير يلوي عليها ولا ما بتخليه يدش ... ام راشد ما صدقت من جافت مايد داش ويا راشد و ربعت صوبه و لوت عليه و هي تصيح ... مايد ماقدر يمنع دموعه انها تنزل عقب ما لوت عليه امه و تم لاوي عليها بالقو ...

ام راشد: الحمدلله ع سلامتك يا ولدي ... ماتدري اشكثر ولهت عليك ... البيت ظلمه من دونك ...
مايد: و انا ولهت عليج اكثر ... و ان شاء الله ما بخليج من عقب هاللحظه ...

و عقب اتيمعت العايله كلها في الصاله ... و الكل

[lαмsαţ shøøg]

هالايام انا مشغوله .. بقراها عقب

[أريج الورد]

*"~*~*~ الجزء الثاني ~*~*~*



%% الخميس 10:02 الصبح %%

" اليوم اللي كنت خايف منه يا ... و ياريته ما يا ... اخخخخخخ يا القهر ... احسلي اتم راقد ولا اسير للمكان اللي يضيج الخلق "

هذي الكلمات اللي كانت تدور براس سيف اللي اتهايز ينش من الرقاد ... الموت عنده ارحم من مجابلة خالد و نغزاته اللي ما تخلص ... على الرغم من انه بو سالم من اعز اصدقاء بو سيف و ربيعه الروح بالروح الا انه العلاقه بين العيال على العكس تماماً من علاقة بو سيف ببو سالم ...

و هو غارق بأفكاره اندق باب الحجره ع الخفيف ...

سيف بصعوبه و هو يعتدل بيلسته: الباب مفتوح ...
جليثم: بعدك راقد؟؟ مو من عادتك ...
سيف و هو يثاوب: ما رقدت عدل امس ...
جليثم و ابتسامه رقيقه مرسومه ع ويهها: شو اللي شاغل بالك هالكثر؟؟
سيف ردلها بابتسامه: ولا شي ...
جليثم: امممممممممم ...
سيف: قولي ...
جليثم: هههههههههه ... ماشي ...
سيف: اكييييد؟؟
جليثم و هي متردده تسأله ولا لاء: اممممممم ... خالد كيف وياك؟؟
سيف و ملامح الصدمه مبينه ع ويهه: بلاه خالد؟؟
جليثم: ماشي بس اقول كيف تعامله وياك؟؟
سيف يحاول يخفي الصدمه: عادي ... كيف تبينه يكون؟؟
جليثم: ولا شي .. بس مجرد سؤال ...
سيف: .................................................. ........
جليثم لاحظت سرحان سيف: اللي ماخذ عقلك ... على العموم بخليك الحين ... قم نش لا ترد ترقد ... ورانا عزيمه ...
سيف يبتسم: ان شاء الله من عيوني ...
جليثم و هي ظاهره من الحجره: تسلم عيونك الحلوه ...

نش سيف من عقب ما ظهرت جليثم عنه ... مشى بخطوات متثاقله صوب الكبت ظهرله ثياب و دش الحمام يسبح ...

*~*~*~~*~*~*

" اوووووووه ... ما صارت عيشه هذي ... الين متى بنتم على هالحال؟؟ "

ام حميد بخضوع: شو تبانا نقولك غير هالرمسه؟؟ تدري بالحال و ما بقا شي ع آخر الشهر شو تبانا نسوي يعني؟؟
حميد بعصبيه: انا ادريبها هاي عووش تخش البيزات لنفسها و تقول ماعندي ...
ام حميد بانفعال: بنتي ما تجذب ... مب من زود المعاش اللي تحصله عشان تخش عنكم شي ... حليلها تشتغل و تكرف و انتو اخوانها الكبار ميلسين في البيت لا شغله ولا مشغله ... سيرو دورولكم شغله تنفعكم بدال هاليلسه اللي ما منها فايده ...
علي: اصبحنا و اصبح الملك لله ... بلاكم تتناقرون ع الصبح؟؟ خربتو رقادنا ... الواحد ما يقدر يتهنى في هالبيت ...
حميد: قول حق امك ... تنرفز بالواحد ...
ام حميد انقهرت: الله يهديكم بس ... الله يهديكم ...

سارت عنهم آمنه حجرتها عقب ما ضايجوها عيالها بتذمرهم اللي ما يخلص ...

ام حميد بخاطرها من القهر اللي فيها: هييييه الله يرحمك يا بو حميد ... رحت و خليتنا بهالحال اللي ما يسر لا عدو ولا صديج ... الله يهديكم يا عيالي ...

...... : ممكن ادخل؟؟
ام حميد: تعالي يا بنتي ...

يت عايشه يلست حذال امها ...

عايشه عقب لحظات صمت: سمعت كل الكلام اللي دار بينكم في الصاله ...
آمنه: لا تواخذينهم يا بنتي ... تعرفين خوانج زين يوم يعصبون ...
عايشه: ما عليج يا امي ... ترى لو شو صار بيظلون اخواني الكبار ...

مرت لحظات من الصمت ...

ام حميد: خواتج نشن؟؟
عايشه: هيه ... توهن واعيات و سارن يتريقن ...
ام حميد: سيري اتريقي وياهن ... و انا بلحقج ...
عايشه بدلع: لالالا اذا خليتج روحج ادري بضايجين نفسج بسبة حميد و علي ... ما بظهر الا و انتي ويايه ...
ام حميد تبتسم: دامج مصره بيي ...
عايشه: فديتج يا احلى ام في الدنيا ... و يخليج لنا ان شاء الله ...
ام حميد: و يخليكم لي و لبعض ...

ظهرن ام حميد و عايشه من الحجره و سارن يتريقن ويا البنات ... بيت المرحوم بو حميد يتكون من سبع افراد الام ام حميد ... الولدين الكبار حميد و علي ... و الباقي بنات اكبرهن عايشه ...

*~*~*~~*~*~*

%% الساعه 12:05 الظهر %%

ليلى كانت ظاهره من حجرتها عقب ما تزهبت و تلبست عشان تسير بيت اختها شمسه عشان العزيمه ... تمت تزاقر بناتها الين ظهرتلها امل و هي شعرها مكشش و ويهها متروس رقاد ...

امل: خير امايه بغيتي شي؟؟
ليلى بانفعال: انتي توج ناشه؟؟ من متى انا موعتنج؟؟
امل: يعني حرام نرقد؟؟
ليلى: جوفي الساعه كم الحين؟؟
امل و هي تجوف الساعه: 12 و خمس ...
ليلى بانفعال: عيل شو تتريين ... سيري بسرعه اتلبسي ... معزومين ع غدا مب عشا ...

و من خلصت رمستها ظهر ناصر من حجرته بنفس حالة امل ...

ليلى باستهزاء: يالله كملت ... متى موعتنكم انا؟؟
ناصر باستنكار: لا يكون تبيني اسير من الحين؟؟
ليلى و هي تقلد ناصر: عيل متى تبا تسير حضرتك؟؟
ناصر: قبل الغدا بنص ساعه اتصلوبي بيي ...
امل: و انا بعد بيي ويا ناصر ...
ناصر: يالله يالله ... مابا حد ويايه ... سيري ويا امايه ...
امل و هي تترجى امها: امايه قوليله ...
ليلى: ماشي ... بتين ويانا و خلاص ... سيري ازهبي بسرعه لا اييج بالنعال ...

اتأففت امل و دشت حجرتها و رقعت الباب وراها ...

ليلى: و انته شو تتريا ... قوم سير اتلبس ...

ناصر طنشها و سار الصاله ... و تمت ليلى منقهره من تصرف ولدها وياها ... نتيجه لاهمالها الزايد لعيالها صار عادي عندهم ما يسمعون كلامها او يسوون عكس اللي هي تطلبه منهم ...

*~*~*~~*~*~*

[أريج الورد]

تابع الجزء الثاني

%% الساعه 1:18 الظهر %%

في هالوقت كان الكل متيمع في بيت بو سالم عشان العزيمه بمناسبة ردة خالد من السفر ... الرياييل كانو يالسين في الميلس الخارجي بحكم انه ميلس الرياييل ... اما الحريم كانو يالسين في الميلس الداخلي ...

|| في ميلس الحريم ||

شمسه (ام سالم) و سلامه (ام محمد) و ظبيه (ام سيف) و مريم كانن يالسات ف صوب و البنات الباقيات ف صوب ... اما ليلى و بناتها كانن توهن واصلات ... دشن الميلس سلمن ع الموجودات و يلسن ...

سلامه لليلى: عيل ريلج ليش ما يا؟؟
ليلى: مسافر كالعاده ... وين بيكون يعني ...
شمسه: الله يعينج على هالسفرات اللي ما تخلص ... الا اقول ام سيف؟؟
ظبيه: اتفضلي ...
شمسه بخبث: سيف شخباره؟؟ خطبتوله ولا بعدكم؟؟
ظبيه اضايجت من سؤال شمسه: لا والله بعده ما عزم ...
سلامه: متى ناوي يعزم؟؟ خالد اللي اصغر عنه ان شاء الله بيعرس جريب ... فديته ما يروم يصبر عن بنت خالته ...
ظبيه: مبروكين و الله يهنيه ان شاء الله ... بس بعد ما نروم نغصب ولدنا على شي ... هو ريال و شوره براسه ...

شمسه و سلامه انقهرن من رمسة ظبيه لانهن توقعن انها ما بتقدر ترد عليهن ... اما ليلى ما علقت ع الموضوع لانه مالها بارض لهالسوالف ...

اما صوب البنات كانن مسويات احزاب ... الريم ويا جليثم و حمده و مها خوات جليثم ... و أسما ويا اليازيه و نوف بنات شمسه و امل و عفرا بنات ليلى ...

الريم لجليثم: ما عليج منها احقريها ...
جليثم: تجوفين فيه شي غلط؟؟ شككتني بعمري الصراحه ...
الريم: يعني اونج ما تعرفين أسامي عدل؟؟
جليثم: عيل اشحقه تطالعني و تضحك؟؟
الريم: قلتلج احقريها و خلاص ... الحقران يقطع المصران ...
جليثم: هيه والله صدقتي ... خليها تموت قهر ...

اما صوب قوم أسما ...

امل: انزين شو بلاه ولد عمج؟؟ صح اني ماعرفهم بس جفته ويا محمد و نحن داشين وعرفت انه ولد عمج ... ماشالله عليه يعق الطير من السما ...
أسما و هي تطالع امل من طرف عينها: وع ... مالقيتي الا سيفوه آخذه ... و بعدين هو ما يهمني لو كان احلى واحد في الدنيا ... اللي يهمني خالد و بس ...
امل باستهزاء: انا هالخالد مادانيه ... احسه غلس شرات نصور ...
اليازيه: ايه ... ماسمحلج ترمسين عن اخويه جي ...
امل: يالله ... مادري منو اخوج انتي الثانيه؟؟
أسما بغيض: امول تراج عصبتيبنا ... سيري يلسي وياهم و فكيني من ويهج ...
امل: ان شاء الله ما طلبتي يا بنت خالتي ...

نشت امل عنهم و سارت صوب قوم الريم ... و عفرا لحقتها لانها ما تحب تيلس في مكان غير البيت من دون اختها ...

اليازيه: اطالع هاييل والله صدقن ...
أسما: خليهن يولن ... عاد اللي يقول نحن ميتات عليهن ...

و في الطرف الثاني ...

امل: ليش سكتن؟؟ لا تخافون مب جواسيس ...
الريم تبتسم: لا والله مب عسب جي ... بس خلصت السالفه ...
امل: هييييه اتحسب بعد ... هاييل بنات عمج؟؟
الريم: هيه ... جليثم و حمده و مها ...
جليثم: و انتي امل صح؟؟
امل: هيه ... و هاي عفروه ...
عفرا: اسمي عفرا مب عفروه ...
امل و هي تطالع عفرا من طرف عينها: لا تبدين بسخافات اخوج انتي الثانيه ...
عفرا: محد سخيف غيرج ...
الريم: انزين بس ... بتضاربون جدام البنات شو تبونهن يقولن عنكم؟؟
جليثم ابتسمت: برايهن ... خليهن ع راحتهن ...
امل لجليثم: انتي تدرسين ويا الريم في الكليه؟؟
جليثم: اكيد ... اصلا نحن ما نروم نصبر عن بعض ...
امل: يا حظكن مب شراتي الين الحين اكرف في ثاني ...
جليثم باستغراب: انتي في المدرسه؟؟ اتحسبتج من عمرنا ...
امل: هههههههه ... هيه من عمركم ... بس مب فالحه في المدرسه ...
جليثم استوعبت السالفه: اها ...

|| في ميلس الرياييل ||

اللي كانو موجودين هم بو سالم و بو محمد و بو سيف و من الشباب سالم خالد و محمد وناصر و سيف ... و كانو يسولفون ويا خالد عن الدراسه برع ومندمجين بالسوالف ... الا سيف بسبة نظرات خالد اللي كلها حقد ... و ناصر اللي ما كان مرتاح للوضع و وده يطلع من هالمكان ...

بو محمد: عقبال ما نفرح بك يا ولدي يا خالد ...
خالد و هو يطالع سيف بخبث: قريب ان شاء الله ...
بو محمد: ان شاء الله ... و نفرح فيكم كلكم يا رب ...
بو سالم: و انته سيف شو ما عزمت؟؟
سيف حس بسجاجين تقطعه من داخل: لا والله بعدني ... مالي بارض لصدعة العرس نتهنا بشبابنا اول و بعدين يصير خير ...
خالد: الا اقول سيف ... هاي سيارتك اللي خاري؟؟
سيف: هيه ... جان تباها ما تغلى عليك ...
خالد بخبث: اكيد ما تغلى عليه ... تراها الا من حلالنا ...
بو سالم بانفعال: خالد؟؟ شو هالرمسه الماصخه؟؟
سيف: خله ع راحته عمي ...
بو سالم: عاد مب جي ترمس اخوك ...
خالد لسيف: اسمحلنا الشيخ ... ما قصدنا نهينك ... الله يهين اللي يهينك ...

بو سالم افتشل من رمسة خالد لسيف و ما قدر يحط عينه بعين بو سيف ... و بو محمد تدارك الوضع و غير السالفه ...

بو محمد: و انت ناصر وينك ما تنشاف؟؟
ناصر ارتبك: امممم ... تعرف مشاغل الكليه مب مخلتنا ف حالنا ...
بو محمد: هيييه ... الله يوفجك ان شاء الله ...

و تمو يسولفون الين حزة الغدا ... و عقب الغدا يلسو شويه يسولفون و يتقهويون الين قبل صلاة العصر الكل روح بيته ...

*~*~*~~*~*~*

%% الجمعه 1:13 الظهر %%

سيف كان توه راد من صلاة الجمعه و توجه صوب حجرة امه على طول ... ام سيف كانت توها مخلصه صلاه و تقرا قرآن ... يلس سيف ع الشبريه الين خلصت ...

ظبيه و جنها حست بسيف: قول اللي في خاطرك ... ادري تبا تقول شي ...
سيف اتنهد: اللي في خاطري تعرفينه ...
ظبيه: يا ولدي شلها من راسك ... تدري انها محيره لولد خالتها من زمان و مرت عمك اصلا ما بترضى لو شو يصير ...
سيف: انا رمست عمي امس و نحن ظاهرين و وعدني خير ...
ظبيه تنهدت: عمك الود وده تكون أسما لك اليوم قبل باجر ... بس هو الله يهداه يمشي ورى شور مرته ...
سيف: مافي حل الا اني ارمس خالد ...
ظبيه: سو اللي يريحك يا ولدي ...

*~*~*~~*~*~*

%% السبت 10:40 الصبح %%

" بس يا سيدي انته متأكد إنو هالشغله قانونيه؟؟ "

...... : ههههههههههه ... و ليش هالخوف يا محمود؟؟ يعني معقوله ولد صاحب الشركه بيورطك في شغله مب قانونيه؟؟
محمود: طيب استاز منصور ... و انا شو بيطلعلي من كل هيدا؟؟
منصور و ابتسامة خبث مرسومه ع ويهه: حاليا بعطيك 5 بالميه ... و اذا اثبت جدارتك بزيدك 5 ...
محمود باستغراب: شو؟؟ بس هيك؟؟ عن ازنك استاز منصور مو شايف انو النسبه كتير قليله؟؟
منصور بتهديد: هذا اللي اقدر اعطيك اياه الحين ... و اذا مب راضي بدور على غيرك ... لا و اكثر من هذا بفنشك من الشغل ... و انت ادرى بظروفك عدل ...
محمود بلع ريجه بصعوبه: لالالا كلو ولا التفنيش ... رح ارضى بالعشره ... انته بتأمرني سيدي ...
منصور يبتسم بخبث: هيك بدي اياك ...
محمود: اقدر استأزن هلأ؟؟
منصور: خلاص ... روح شوف شغلك ...
محمود: عن ازنك استاذ ...
منصور: اتفضل ...

ظهر محمود من مكتب منصور و سكر الباب وراه ...

منصور بخاطره: هيييييه يا بويه ... انا تعاملني مثلي مثل باقي الموظفين و عيال ليلوه يتهنون بالفلوس ع البراد؟؟ جوف اللي بييك مني الحين ... ماكون انا ولد ام منصور اذا ما خذت حقي منك ...

*~*~*~~*~*~*

[أريج الورد]

تابع الجزء الثاني


%% الساعه 12:02 الظهر %%

في هالوقت في الكليه الريم و جليثم كانن توهن ظاهرات من الكلاس و عندهن بريك الين الساعه 2 ...

...... : منو هالحلوه اللي تمشي جدامي؟؟

التفتن الريم و جليثم ع ورى يطالعن منو اللي وراهن ...

جليثم: انتي هني؟؟ وينج يا المختفيه ما تنجافين؟؟ ولا جنه في نفس الكليه ...
منال: تعرفين اني business woman و ما افضى ...
جليثم: هههههههه انتي ما تملين من المرابع ورى هالبنات؟؟ مادري كيف مستحمله حركاتهن الماصخه ...
منال: ههههههههه ... شو نسوي الدنيا طماشه ... هن اللي مصدقات عمارهن ولا انا لايعه جبدي منهن و من حركاتهن ...
جليثم: ههههههه ... انتي اللي يبتي الشقا لنفسج ...
منال و هي تجوف ربيعاتها يأشرولها: يالله عيل بخليج الحين ... ترى حمدان بيرد عقب اسبوعين و بنسوي عزيمه ... خلينا نجوفج عاد ... سلمي على خالي ... بااااي ...
جليثم: باي ...

سارت منال بنت عمة جليثم عند ربيعاتها ... اما الريم و جليثم كملن طريجهن صوب الكافتيريا ...

الريم: يالله يالكافتيريا شقا زحمه ...
جليثم: هاذي امون اتأشرلنا ...
الريم: وينها ماجوفها؟؟
جليثم: هذي جدامج على طول ...
الريم: هيه خلاص جفتها ...

سارن الريم و جليثم صوب أمينه ربيعتهن و يلسن وياها عقب ما سلمن عليها ...

الريم: لهالدرجه البنات يواعى اليوم؟؟
أمينه: زين اني حصلت هالطاوله ... و انتن حظراتكن تتمشن ع مهلكن ...
جليثم: ما درينا انه الكافتيريا زحمه جي ... جان ربعنا نحجزلنا مكان ...
أمينه: ههههههههه ... ماتخيل اشكالكن و انتن تربعن ع الطاولات ...
الريم: اخبرج بلا كلام فاضي ... و نشن نسير نطلبلنا اكل ...

نشن ثلاثتهن و خلن اغراضهن ع الطاوله عشان محد يشلها عنهن و طلبن اكل و ردن ...

...... : ممكن نيلس وياكن؟؟ ما حصلنا طاولات فاضيه ...

جليثم: اتفضلي اسما ممكن ليش لاء ...
أسما و هي تطالع جليثم من طرف عينها: مشكوره غناتي ...

يت أسما و ربيعتها هند و يلسن ويا قوم الريم ...

أمينه للريم و أسما: انتن خوات؟؟
أسما: هيه ... انا العوده و هي الصغيره ...
أمينه: ماشالله تشابهن ...
أسما باستهزاء: بس انا احلى ... صح هندوه؟؟
هند: هيه طبعا ... انتي احلاهن كلهن ...
أسما: فديتني والله ... حتى احلا عن جليثم ...
أمينه: لا عاد بصراحه انا اجوف جليثم احلاكن ثنتيناتكن ... وجهة نظري طبعا ...
أسما بغرور: هاي الطويله احلى عني؟؟ ماعندج سالفه الصراحه ...
أمينه: بالعكس ... حلو طولها مب شراتنا نحن الاقزام ...
أسما: اقول هندوه خلينا نقوم من هني احسلنا ... اكيه طاوله فاظيه هناك ...
هند: يالله ...

راحت هند عن قوم الريم و هي منقهره من رمسة أمينه ...

أمينه: انتي متأكده انه هاي اختج؟؟
الريم: هي جي ما تتغير ... تقهر ... "و التفتت صوب جليثم" و انتي ليش ما رديتي عليها؟؟
جليثم: خليها ع راحتها ... مافيني اضارب وياها ...
الريم بانفعال: انتي اللي تقهريني ببرودج معاها ...
أمينه: بس هي ليش مادانيكم؟؟
الريم: هاي الله يسلمج الشي اللي تحبه امايه تحبه و اللي ما تحبه امايه هي بعد ما تحبه ... و خصوصا قوم عمي ...
أمينه: اسمحيلي ع الفضول ... بس امايه الله يسلمج ...

و قبل لا تكمل رمستها أشرتلها جليثم بعيونها انها ما تخبر أمينه بالسالفه فسكتت ... و أمينه لاحظت انه جليثم ما تبا الريم ترمس في الموضوع فسوت عمرها مب مهتمه بالسالفه ...

و عقب خمس دقايق استأذنتهم جليثم و قالتلهم بتسير الحمام شويه تعدل شعرها و بترد ... و من سارت عنهن جليثم أمينه استلمت الريم بالأسئله ...

أمينه: انزين قوليلي السالفه دام انه جليثم محد ...
الريم: اسمحيلي ماقدر اقولج ... جليثم ما ترضى ...
أمينه تترجى الريم: انزين هي محد الحين ... صدقيني ما بخبرها اني عرفت السالفه ...
الريم: لالالا ... ماقدر ... يوم هي تباج تعرفين بتخبرج بنفسها ...
أمينه: ريموه عاد ... يالله بسرعه قبل لا ترد ...
الريم: آسفه ماقدر ...

و تمت أمينه تحن على الريم الين استسلمت الريم ...

الريم: الله يسلمج امايه اصلا ماداني عمي و عايلته كلها و السبه خالتي شمسه اللي هي اختها العوده ...
أمينه بفضول: بعد السالفه فيها خالتج؟؟
الريم: هيه ... هي اللي تفرض رايها على امايه و امايه وراها ما تروم تقولها شي ...
أمينه: لهالدرجه امج ضعيفه جدام خالتج؟؟
الريم: ههههههه ... الظاهر ماعرفتي امايه عدل ... امايه اصلا من زمان ماداني قوم عمي بس ما كانت تبين هالشي الا يوم صارت هاييج السالفه ...
أمينه: تراج حرقصتيني ... ارمسي بسرعه ...
الريم بارتباك: هذي جليثم يايه ... بس صخي ...
أمينه و خيبة امل بينت ع ويهها: يا الله ...
الريم: ههههههههههه ...
جليثم: تحشون فيه ادري ...
أمينه: افا ... هذا ظنج فينا؟؟ ماهقيتها منج الصراحه ...
الريم: افا عليج يا بنت سعيد ... ما عاش اللي يحش فيج ...
جليثم: انزين بلا مجاملات و على كلاساتكن يالله ...
الريم: يالله مشينا ...

نشن ثلاثتهن من مكانهن و ظهرت من الكافتيريا سايرات كلاساتهن ...

*~*~*~~*~*~*

%% الساعه 2:40 الظهر %%

في هالوقت ببيت بو راشد كانو توهم مخلصين غدا ... ام راشد و بو راشد و راشد و مايد يالسين يتقهويون في الصاله ... اما البنات سارن يقيلن شوي عقب تعب المدرسه ...

بو راشد لمايد: يا مايد يا بويه انته الحين بخير و ما عليك شر ... لازم تكمل دراستك ... فأنا اقول لو تسير تسوي اوراقك و ترد تدرس من السنه اليايه يكون احسن ...
مايد: لالا ... مابي ارد لذاك المكان مره ثانيه ...
بو راشد: و دراستك؟؟ بتودرها يعني؟؟
مايد: لا ما بودرها ... بدرس هني في البلاد ... اما سيره للندن مره ثانيه مب ساير ...
بو راشد: انزين مب شرط لندن ... قول انته وين تبا و بنوديك ولا تيلس بليا دراسه ...
مايد: ما يحتاي الوالد ... الحين الدراسه في البلاد صارت وايد احسن عن قبل ... و بعدين انا مليت من الغربه ... بسجل في أي جامعه او كليه ... التخصص و الحمدلله موجود في البلاد ...
ام راشد: كلام مايد صحيح ... و فوق هذا انا بعد ماباه يتغرب عني كثر ما تغرب ...
بو راشد: و انته شو تقول يا راشد؟؟
راشد: انا ويا مايد في كل اللي يقوله ... و اذا يبا يشتغل و يدرس في نفس الوقت اقدر ادبرله شغله ...
مايد: خل سالفة الشغل بعدين ... كورس واحد و اخلص ... لاحق ع الشغل ...
راشد: خلاص براحتك ...

*~*~*~~*~*~*

%% الساعه 9:20 فليل %%

" خلاص عيل ... خلك جاهز بمر عليك الساعه عشر ... يالله باي " ... و سكر الخط ...

مريم : على وين يا حلو؟؟
خالد اتفاجأ بوجودها: اخبرج؟؟ انتي حد حاطنج جاسوس عليه ولا شو؟؟ دقي الباب قبل لا ادشين ...
مريم: ماعندي شغله اسويها ... قلت اشتغل جاسوس احسن ... شو رايك؟؟
خالد باستهزاء: حلوه منج يا جاسوسه ... عرسي و فكينا من ويهج ... ما نحتاي جواسيس في البيت ...
مريم اضايجت من رمسة خالد: لا يكون يالسه ع راسك؟؟ تراني يالسه ف بيت ابويه ... و آكل من خيره ...
خالد: اللي كبرج عرسن و عندهن من العيال عشر و انتي الين الحين يالسه ف بيت ابوج ... مستانسه ع روحج انتي؟؟
مريم انصدمت من رمسة خالد: مشكور و ما قصرت ياخوي يا ولد امي و ابوي ... ايي منك اكثر ...

ظهرت عنه مريم و رقعت الباب وراها ...

خالد بخاطره: سيره بلا رده ... مشكله اللي يزعلون من قول الصدج ...

و عقب ما ظهرت مريم عنه دش الحمام اسبح و اتكشخ و ظهر من الحجره ... دش الصاله امه كانت يالسه روحها ...

خالد: مسا الخير ...
شمسه: مسا النور ... اجوفك كاشخ و ريحة العطر تسبقك ... ظاهر؟؟
خالد: هيه ... بظهر ويا ناصر بنسيّر ع الربع ...
شمسه: ايلس ويانا شويه ... ما شبعنا من شوفتك ولا سمعنا سوالفك ...
خالد: عن الشوفه تراني يالس في البلاد و بتملون من شوفتي بعد ... و عن السوالف تراكم لاحقين عليها ...
شمسه: ماعاش اللي يمل من شوفتك ...
خالد: تسلمين لي يا احلى ام في الدنيا ... بس انا لازم اظهر الحين ...
شمسه: خلاص برايك ابويه ... بس لا تتأخر ...
خالد: ان شاء الله ... "و أشر على عيونه" من العين هاي قبل هاي ...
شمسه تبتسم: فديت عيونك الحلوه ...
خالد: عيونج الاحلى ... يالله فمان الله ...
شمسه: حافظنك الرحمن ...

*~*~*~~*~*~*

%% الساعه 10:05 فليل %%

" شو؟؟ شحات انا اخلي ربعي يصرفون عليه؟؟ ولد عبدالله الـ(.......) يظهر بليا بيزات؟؟ "

ليلى باستهزاء: مادري عاد منو ابوك يا ولد عبدالله ...
ناصر: لا تطولينها و هي قصيره ... ابا بيزات الحين ... خالد يترياني برع مب فاضي لج ...
ليلى: لو خالد اللي برع جان دش ... و ظهره ويا هذا اللي يسمونه عمر ماشي ... ايلس في البيت احسلك ...
ناصر بعصبيه: قلتلج بظهر ويا خالد ...
ليلى بكل برود: تعال صفعني بعد ...
ناصر تم يتحرطم بصوت واطي ...
ليلى: قلتلك ظهره ماشي ... ولا اتم واقف ع راسي جي ...
ناصر: ......................................<<<<<<< طنشها و ظهر من البيت ...

امل اللي كانت واقفه تسمع كل اللي دار بين امها و اخوها من كلام يت الصاله عقب ما اتأكدت انه ظهر ... و يلست حذال امها ...

ليلى: شو تبين انتي الثانيه؟؟
امل: اعصابج عليه ... مابا شي ...
ليلى بدون نفس: اتحسب بعد ...

و عقب دقايق صمت ...

امل: عيل ما ظهرتي اليوم ولا يوج ربيعاتج؟؟ مع انج ضايجه ...
ليلى: مالي مكان اسيرله ...
امل: غريبه عيل ناهد و منى وين سارن؟؟
ليلى: منى مشغوله اليوم و ناهد مسافره ...
امل باستغراب: اونه؟؟ هاي ناهد ماعندها فلوس تاكل ... من وين لها تسافر ...
ليلى بعصبيه: امول ... شو هالرمسه الماصخه؟؟ عيب و اياني و اياج اجوفج تعيدين هالرمسه مره ثانيه ...
امل: انزين شو قلت انا؟؟ ما قلت الا الصدج ...
ليلى: قومي سيري حجرتج يالله ... ماباجوف رقعة ويهج ...
امل: افففففففف ... انزين قمنا ...

امل خلت امها روحها و سارت حجرتها ...

ليلى بخاطرها: حسبي الله على بليسكم من عيال ... كل واحد لسانه متبري منه ... الشرهه مب عليكم على ابوكم اللي راخي لكم الحبل ...


|| في سيارة خالد ||

خالد: هههههههههههههههههههه ...
ناصر بانفعال: و انته على الشو تضحك؟؟ على خيبتك؟؟
خالد: ههههههه ... بس بس دخيلك ... خلني اسوق عدل ... ما نبا نموت ...
ناصر: ماعندك سالفه انته الثاني ... طالع على خالتك ما تنلام ...
خالد: يحليلج يا خالتي ... من خوفها عليك شو تسوي ...
ناصر: هاي لو تعرف الخوف جان خافت من زمان ... مب عقب فوات الاوان ...
خالد: بس بعد حرام تقول عنها جي ... لو شو صار هاي امك ...
ناصر باستهزاء: بس بس الله يخليك ... غير هالسالفه ...
خالد: ولا يهمك يا ولد الخاله ... شخبار الكليه وياك و متى التخرج؟؟
ناصر: ههههههه ... خلاص تخرجت ...
خالد باستغراب: لا والله؟؟ كيف جي؟؟
ناصر: فصلوني من الكورس اللي طاف و انته خبر خير ...
خالد: و خالوه شو سوت يوم درت؟؟
ناصر: خالتك لو تدري بالدنيا زين ...
خالد: الصراحه ما تخيل ردة فعلها يوم بتعرف بامجاد ولدها ... اسميها بتنشر الخبر في الجرايد ...
ناصر: افففففف ... بعد رد على خالته ...
خالد: انزين خلاص سكتنا ... وين بنحصلهم الربع؟؟
ناصر: في المكان المعتاد ... شقة عمور ... ادلها ولا نسيت بعد؟؟
خالد: ادلها وحياتك ...
ناصر: يالله عيل اسرع ... احس راسي مصدع و ابا اعدل المزاج ...
خالد: ولا يهمك يا ولد خالتي ... كم ولد خاله اسمه ناصر عندي انا ...

و سارو خالد و ناصر يكملون السهره ويا شلة الفساد اللي مالها شغله غير انها تتيمع في شقة عمر كل ليله ...

[أريج الورد]

الحين حطيت لكم جزئين من القصة

اذا عجبتكم قولو لي عشان اكملها لكم ترى احداثها مثيرة وغير متوقعة

[أريج الورد]

افا وين الردود محد قرا قصتي ..........:sadness:

[أريج الورد]

*~*~*~ الجزء الثالث ~*~*~*





%% الاحد 8:07 الصبح %%

" هاه عايشه؟؟ متأخره اليوم "

عايشه انحرجت: آسفه استاذ سالم ... السياره خربانه خذت وقت لين حصلت تكسي و الشوارع زحمه ... ان شاء الله ما يتكرر هالشي مره ثانيه ...
سالم: عيل اخوانج وين؟؟ ليش ما يوصلونج؟؟
عايشه انحرجت اكثر من أسئلة سالم: هي سياره وحده و الكل يستخدمها ...
سالم لاحظ انها انحرجت: اها ... خلاص شوفي شغلج ... و اذا بغيتي أي مساعده انا حاظر ...
عايشه ابتسمت: مشكور و ما تقصر ...

ظهر سالم من مكتب قوم عايشه و لف على باقي المكاتب اللي في قسمه ... لانه متعود يمر ع مكاتب الموظفين بنفسه من يوم ابوه سلمه رئاسة القسم اللي هو يشتغل فيه ...

عايشه كانت تشتغل في مكتب و وياها ثنتين يساعدنها ...

إيمان: اقول عايشه؟؟
عايشه: اتفضلي ...
إيمان: تراني عازمتنج على حفلة عيد ميلادي يوم الاربعا ... و اتمنى انج تكونين موجوده ...
عايشه: اسمحيلي ... هلي ما يخلوني اظهر من البيت ... و انا من نفسي ماحب اظهر من البيت ...
سلمى: ما تحبين ولا ودج و ما تقدرين؟؟

و ظحكن إيمان و سلمى من عقب الرمسه اللي قالتها سلمى ...

سلمى: عادي حبيبتي ... اذا تبين بسلفج لبس عدل تلبسينه حق الحفله ... و بكشخج بنفسي ... و اذا ع المواصلات بوديج بسيارتي ...
عايشه بدون نفس: مشكوره و ما قصرتي ... قلتلج ماحب اظهر من البيت ...
إيمان: كيفج ... انتي الخسرانه ...

و هذي عادت سلمى و إيمان من بداية الدوام الين آخره ... حش في الاوادم و من تخلص سوالفهن ردن على عايشه اللي دوم اطنشهن ...

*~*~*~~*~*~*

%% الساعه 10:45 الصبح %%

" يا الله ... يعني ماشي رقاد اليوم؟؟ بس الله يقطعكم صدعتونا "

نش خالد من على الشبريه بخطوات متثاقله و هو حاس بالدنيا تدور حواليه ...

خالد لأمه اللي تدق عليه الباب: لحظه ياي ...
شمسه عقب ما فج خالد الباب: صباح الخير ... شو كسالى اليوم؟؟
خالد: صباح النور ... اسمحيلي امايه تعبان و احس بدوره ...
شمسه بقلق: شو بلاك؟؟ شي يعورك؟؟
خالد ارتبك: لا بس ما رقدت عدل فليل ... الظاهر طولت في السهر ...
شمسه: قلتلك لا تتأخر ما سمعت الكلام ...
خالد ابتسم: ان شاء الله ما بسويها مره ثانيه ...
شمسه ردتله الابتسامه: دوم اسمعها هالرمسه و ماجوف شي ...
خالد اونه زعل: افاااااا ... انا خالد ولدج الحبيب تقولين عني جي؟؟
شمسه: شسوي يا ولدي ... من خوفي عليك ...
خالد و هو مب مقتنع من اللي يقوله: خلاص ... هالمره وعد ...
شمسه: فديت روحك انا ... ربي لا خلاني منك و من شوفتك ...
خالد: آمين ...
شمسه: خلاص عيل بخليك ... دش الحمام و اسبح و اتنشط و ان شاء الله ما عليك شر ...
خالد: ههههههه ... امايه الله يهداج انا ياهل توصيني ...
شمسه: لو تصك الخمسين بتم ياهل ف نظري ...
خالد: خلاص مقبوله منج ... كم ام سالم نحن عندنا ...
شمسه: انزين يالله بسك مب جنك شبعت رمسه ... يالله قوم سير اسبّح ...
خالد: ان شاء الله ...

*~*~*~~*~*~*

%% الساعه 8:25 فليل %%

" بس اهم شي ما تكونين نسيتي اللي وصيتج عليه ... خلاص حبيبتي توصلين بالسلامه ان شاء الله ... مع السلامه " و سكرت الخط ...

امل و هي حاطه ايدها ع خدها و تطالع امها: ست الحسن اخيرا بتشرف؟؟
ليلى بعصبيه: انتي و بعدين وياج؟؟ كم مره قايلتلج عن هالالفاظ؟؟
امل تحاول تمسك ضحكتها: سوري والله نسيت عمري ...
ليلى عطتها نظره ناريه و ما ردت عليها ...

...... : السلام عليكم ...

ليلى + امل: و عليكم السلام و الرحمه ...
امل فزت من مكانها و سارت لوت على ابوها: هلا والله ... الحمدلله ع السلامه ... تولهت عليك باباتي ...
عبدالله: هههههههه ... يا اللوتيه ... اتولهتي عليه ولا على الظهرات ...
امل: هههههههه ... و منو قالك اني ما كنت اظهر؟؟
ليلى بحزم: امل؟؟
امل: اوه صح ... ما كنت اطلع ... صدق ولهت ع الطلعات ...
عبدالله: يوم اقولج لوتيه ما تصدقين ... " و التفت صوب ليلى" السلام عليج يا ام ناصر ...
ليلى من طرف خشمها: و عليكم السلام ... الحمدلله ع السلامه ...
عبدالله و هو ييلس عدال ليلى: الله يسلمج من الشر يا ام ناصر ...
امل بدلع: اقول باباتي ... شو يبتلي من المكان اللي سرتله؟؟
عبدالله: شو بييبلج بعد؟؟ ساير اشتغل حبيبتي مب ساير اتمشى ...
امل سوت روحها زعلانه: افا ... تسافر و تنسى احلى و اغلى بنت لك؟؟ انا زعلت ...
عبدالله: هههههههههههه ...
ليلى: امول ... قومي سيري حجرتج ...
امل: ليش؟؟ شو سويت؟؟
ليلى: ولا شي بس سيري حجرتج يالله ...
عبدالله: شوي شوي ع البنت شو تبين بها؟؟ خليها يالسه مستانسه ...
ليلى بانفعال: بتقومين ولا شو؟؟
امل تأففت: هاه قمنا بس ...
عبدالله بانفعال لليلى: بلاج ع البنت؟؟ انتي الين متى بتمين تعاملين عيالج جي؟؟ حشى مب ام انتي ...
ليلى:خلهم يتأدبون و يعرفون كيف يتعاملون ويا امهم ... حشى كل واحد لسانه متبري منه ...
عبدالله و هو ينش من مكانه: لا حول ولا قوة الا بالله ...
ليلى: على وين انته الثاني بعد؟؟ عنبوه توك ياي ...
عبدالله: بسير اونس روحي شوي ... اللي يجابل ويهج يعاف الدنيا و ما فيها ...
ليلى بانفعال: هيه ... سو شرات ولدك انته بعد ...

عبدالله ما سوالها سالفه و ظهر عنها ...

و في الطرف الثاني من البيت ... في حجرة عفرا بالتحديد ... دشت امل على اختها اللي كانت مجابله الكمبيوتر و رقعت الباب بأقوى ما عندها ...

عفرا: كسرتي الباب انزين ... شو بلاج؟؟
امل: هذي امج تقهر الواحد ... شو اسويبها يعني؟؟
عفرا: احترمي نفسج هاي امج مب وحده من ربيعاتج جي ترمسين عنها ...
امل: بس بس الله يخليج ... محد يرمسج انتي يا بنت امج ... اوني يايه اشتكيلج ... شكلي غلطت يوم ييتج ...

ظهرت امل من حجرة اختها محرجه و بعد رقعت الباب وراها بالقو ...

عفرا: الحمدلله و الشكر ... شو سالفتها هاي كله معصبه؟؟ الله يسامحج يا امول انتي و نصور على اللي تسوونه في امايه ...

*~*~*~~*~*~*

%% الاربعا 5:30 العصر %%

في هالوقت سلامه كانت مسيّره على اختها شمسه و وياها البنات ... و كالعاده شمسه و سلامه و مريم رواحهن يسولفن و باقي البنات سارن ييلسن في الحديقه اللي ورى البيت ... و هم يالسين مندمجين بالسوالف ظهر خالد من حجرته متكشخ و متعطر و مر سلم على خالته ...

خالد و هو ييلس عدال خالته: شحالج خالوه و شخبارج؟؟
سلامه: الحمدلله انا بخير و سهاله ... شحالك انته و شو صحتك؟؟
خالد: دامج بخير انا بخير ...
سلامه: ان شاء الله دوم ...
خالد: وياج ان شاء الله ... عيل البنات وينهن؟؟
سلامه: مادريبهن توهن ظهرن ...
شمسه: سارن ييلسن في الحديقه جنهن ...
خالد: اها ... خلاص عيل انا ساير الحين ...
شمسه: مثل ما وصيتك ابويه لا تتأخر ...
خالد: ان شاء الله الغاليه ... " و حبها ع راسها " يالله فمان الله ...
شمسه + سلامه: حافظنك الرب ...

ظهر خالد من الصاله و سار صوب الحديقه يسلم على بنات خالته ... او بالاصح يسلم على اسما و يكحل عينه بشوفتها ... على الرغم انه خالد ما يحس انه يحب اسما ذاك الزود بس ما يدري هو ليش يستانس لشوفتها ... و يمكن حب سيف لاسما بنت عمه و حب اسما لخالد خلاه يصمم على انه يزوجها و يحر سيف اللي ما خلا أي طريقه من الطرق عشان يخلي يهون خالد عن الزواج بأسما ... يعني بكل بساطه أنانيته خلته يصر على زواجه من أسما بنت خالته ...

اما في الحديقه البنات كانن مودرات الطاولات و الكراسي و يالسات ع الحشيش يسولفن ...

خالد: ماشالله ماشالله ... عيل الطاولات و الكراسي لمنو مخلينهن؟؟
نوف: حق اليلسه طبعا ... بس مب لازم نيلس عليهن ...
خالد طنشها: شحالج أسما؟؟
أسما بمستحى و هي منزله راسها: الحمدلله بخير ...
اليازيه: و عليكم السلام و الرحمه ... سلم اول بعدين اسأل عن الحال ... و بعدين الريم بعد ويانا اشمعنى أسما بس اللي سألتها؟؟
خالد: انتي ما يخصج ... " و التفت صوب اسما " محمد في البيت؟؟ <<<<< يدري انه محد بس حب يطول السالفه ...
أسما: لاء ... ظهر ويا ربعه ...
خالد: اها ... سلمي عليه ...
اليازيه: ههههههههههههههههههه ... حلوه منك ياخوي ...
خالد: شو بلاج؟؟ تضحكين على خيبتج؟؟
اليازيه: لاء اضحك على خيبتك ... جنك ما بتتلاقى وياه ... اون "سلمي عليه" <<<< قالته بنفس طريقة خالد ...
خالد: ويا ويهج يا الهبله ...

و طنشها و سار عنهن صوب سيارته و ظهر من البيت ...

اليازيه لأسما: و انتي اونج من متى قمتي تستحين؟؟
أسما: جب ... ما يخصج فينا انا و ريلي ...
نوف: هيه ماشالله ... متى استوى ريلج؟؟
أسما: بيستوي جريب ...
الريم: انا سايره داخل ... حر الجو برع ...
اليازيه: كلنا بندش يالله نشن ...

*~*~*~~*~*~*

[أريج الورد]

تابع الجزء الثالث




%% الساعه 7:45 فليل %%

" الباب مفتوح " قالها مايد للي خرب عليه خلوته بنفسه بدقته للباب ...

مايد: هلا راشد بغيت شي؟؟
راشد: هيه ... معزوم عند الربع و اباك تسير ويايه ...
مايد اعترظ: اسمحلي راشد ... مالي بارض اظهر و اجابل الناس ...
راشد يلس مجابل مايد: الين متى بتم تتهرب من الناس ... خلاص انته الحين مب مايد الاولي ... ليش مب راضي تقتنع انك تغيرت؟؟
مايد بحسره: اذا انا تغيرت ... نظرة الناس لي مستحيل تتغير ...
راشد: يا مايد ... ياما ناس ادمنو و اتعالجو و الحين عايشين حياتهم و يشتغلون و مستانسين ... يت عليك انته اللي بتستوي تعيس؟؟
مايد: راشد و اللي يرحم والديك خلني بروحي ... كفايه كلام الناس اللي ما يخلص ...
راشد باصرار: لا والله ما خليتك بروحك ...
مايد: راشد لا تحلف ... قلتلك مب ظاهر ...
راشد: بحلف مب كيفك ... و ظهره بتظهر ويايه ...

و في هاللحظه سمعت ام راشد و بو راشد اللي كانو ظاهرين من حجرتهم سمعو الكلام اللي يدور بين راشد و مايد و دشو عليهم ...

ام راشد بقلق: خير؟؟ شو بلاكم؟؟
راشد: ولدج الله يهداه مب راضي يطلع من السجن اللي حابس روحه فيه ...
بو راشد: ليش تسوي بروحك جي يا ابويه ... اطلع استانس جوف الناس كيف عايشه ...
ام راشد بقلق: و انتو شو تبون ف وليدي استقويتو عليه جي ... خلوه ع راحته ...
راشد: يا امايه لا تخربين عليه ... خليه شويه يرفه عن نفسه ما يصير جي ...
مايد: راشد الله يخليك و غلاة امايه عندك خلني روحي ...
راشد: غلاة امايه على عيني و على راسي ... بس اللي انته يالس تسويه في روحك بيضرك اكثر من ما يفيدك ...
مايد: قلتلك مافيه ع كلام الناس ...
راشد: ياخي خل عندك اراده شوي ... بتصرفك هذا انتي اللي بتخليهم يرمسون عنك ... خلك واثق من نفسك و اكسر كلامهم ...
بو راشد: كلام اخوك صح يا وليدي ... الناس ما ايون الا جي ... شو قلتي يا ام راشد ...
ام راشد: انا معاكم في اللي تقولونه ...
راشد لمايد: هاه شو قلت الحين؟؟
مايد بيأس: خلاص بظهر ... بس بشرط ...
راشد: آمر و انا انفذ ...
مايد: ما بنطول وايد في اليلسه ...
راشد تنهد: ان شاء الله ... يالله اترياك انا في الصاله ...

ظهرو بو راشد و ام راشد و راشد عن خالد ... اما مايد دش الحمام يسّبح و اتلبس و اتعطر و هو متخوف من اللي ممكن يصير اذا تلاقى ويا حد من اللي يعرفون بماضيه الاسود ...

*~*~*~~*~*~*

%% الساعه 8:00 فليل %%

" يالله يالله ... عروس مب ناهد اللي اعرفها من زمان "

ناهد بوناسه: ليش؟؟ شكلي متغير؟؟
ليلى: الا متغير تغيير جذري ... متأكده انج ما سويتي عمليه و انتي هناك ...
ناهد بخبث: هههههههههه ... و بس العمليات اللي تحلي الوحده؟؟
منى: شكلها حصلت معرس و احلوت من خذها ...
ليلى: ههههههههه يمكن كل شي جايز ...
ناهد: لا عاد استريحن لا معرس ولا شياته ... انا امبوني حليوه ...
ليلى: هههههههههه اكيد و انا اشهد ...
منى: انزين قوليلنا ... شو لبنان وياج؟؟ ان شاء الله يبتيلنا شي غاوي ...
ناهد: يايبتلكم الخير الجثير بس صبرو عليه شوي خلوني ارتاح اول و بعدين كل وحده بتاخذ نصيبها ...
ليلى: يالله نتريا ... بس عساه يكون شي زين ...
ناهد: افا عليج ... اعجبج انا ...

و تمن ثلاثتهن يسولفن الين نص الليل و عقبها ظهرن منى و ليلى عن ناهد و كل وحده سارت بيتها ...

*~*~*~~*~*~*

%% الساعه 9:15 فليل %%

في هالوقت كانو راشد و مايد توهم واصلين بيت بو سالم بحكم انه راشد ربيع سالم من زمان و انه سالم عازم ربعه في ميلس بيتهم الخارجي كعادته كل اربعا و خميس ...

من الوقت اللي بند فيه راشد السياره الين قربو من الميلس و مايد دقات قلبه تزيد مع كل خطوه ... راشد لاحظ توتر مايد اللي مبين ع ويهه ...

راشد: بعدك خايف؟؟ لا تخاف حتى لو في حد يعرفك مافيها شي ...
مايد يحاول يخفي خوفه: لا تحاتي ... بس مثل ما اتفقنا ما نطوّل ...
راشد: ان شاء الله ...

راشد طمن مايد بكمن كلمه بس بعد ما فاد وياه و تم هالتوتر ملازمنه الين دشو الميلس و كانت المفاجأه ...

من ظمن الموجودين كانو سالم و خالد وياه ناصر و محمد ولد خالتهم بالاضافه الى سيف ولد عم محمد ...

الشباب من جافو راشد و مايد داشين نشو يسلمون عليهم ... مايد و هو يسلم ع الشباب الموجودين جاف واحد شكله مألوف بالنسبه له بس ما يذكر بالضبط وين جايفنه ... و عقب ما دقق في ملامحه عدل عرف انه كان يدرس وياه في لندن و هالشي خلاه يضايج بس ما حب يبين هالشي ...

و في الطرف الثاني خالد كان واقف عدال ناصر يتريون دورهم يسلمون على راشد و مايد و طول الوقت خالد يصاصر ناصر ...

محمد بصوت واطي: بسكم حش ... عنبوه صرتو شرات الحريم ...
خالد: ابا اعرف هذا شو يسوي هني؟؟
محمد: هذا الله يسلمك ربيع سالم ... ليش؟؟
خالد: راشد اعرفه ... اقصد اللي وياه ... راعي المخدرات شو يسوي عندنا؟؟
محمد: بس بس قصر حسك فضحتنا ...

و عقب ما قال محمد جملته هاي صخو كلهم عشان يسلمون على راشد و مايد و عقب ما سلمو يلسو كلهم يسولفون و ماخذين راحتهم الا مايد اللي حاس انه شكله غلط من بينهم ...

سالم: و شخبارك يا مايد و شو علومك؟؟
مايد ارتبك: الحمدلله ع كل حال ...
سالم: ماشالله وين تشتغل الحينه؟؟
مايد زاد ارتباكه: ما اشتغل ... انقطعت عن الدراسه فتره و ما رديت اكمل ...
سالم باستغراب: افا ... ليش عاد؟؟
مايد سرح بفكره بعيد و تم يقول في خاطره: شو تباني اقولك اني كنت مدمن و خيبت ظن اهلي فيني؟؟ ولا تبيني ادورلك على جذبه مقنعه؟؟

سالم استغرب من سرحان مايد المفاجيء ... و راشد تدارك الوضع و رمس بداله ...

راشد: مل من الغربه و ما بغا يكمل ...
سالم: عاد مب يقطع دراسته بالمره ...
راشد: ما عليه من السنه اليايه بيكمل و بيتخرج ...
سالم لمايد: اكيد لازم يخلص و يفتك ... على العموم الله يوفجك ...

و هني اشر مايد لراشد بعيونه بدون لا يلاحظون الباقين انه يطلعون من هالمكان بأسرع وقت ممكن ... راشد فهم نظرات مايد و قال بيترخص من سالم ...

راشد: خلاص عيل نترخص منكم الحين ...
سالم: وين يا ريال ما مدانا نيلس وياكم ... عشا ما تعشيتو ...
راشد: مره ثانيه ان شاء الله ... الوالده مب صاحيه ما نروم نخليها بروحها ...
سالم: سلامتها ما تشوف شر ... سلمو عليها ...
راشد: يوصل ان شاء الله ...

ظهرو راشد و مايد عن الشباب و سارو البيت على طول ... اما الباقين تمو يالسين شويه و اتعشو ...

ع الساعه 11:30 بدا الميلس يفظا من الموجودين ... عقب ما روحو باقي الشباب سالم دش البيت و محمد سار بيتهم و ما تم في الميلس غير خالد و ناصر و سيف ... خالد لاحظ انه سيف عنده شي يبا يقوله ...

خالد: هاه سيف؟؟ بغيت شي؟؟
سيف: ابا ارمسك على انفراد ممكن؟؟
خالد: ناصر ولد خالتي مب غريب ... تقدر ترمس جدامه ...
ناصر: ما يحتاي ... بترياك في السياره ...
خالد: برايك ما بتأخر عليك ...

و عقب ما ظهر عنهم ناصر ...

سيف: تعرف الموظوع اللي ابا ارمسك فيه ما يحتاي اعيده ...
خالد: و انا ارد اقولك آسف ... ماقدر اهوّن ...
سيف: ليش؟؟ تحبها؟؟

خالد انصعق من سؤال سيف و ما رد عليه ...

سيف: يا خالد افهمني ... عمرك جربت خسارة شي انت تحبه و تموت فيه ... حط نفسك في مكاني ...
خالد عقب فترة صمت: اوكي اذا انت تحبها و تموت فيها تعرف اذا هي تحبك ولا لاء؟؟

سيف تمت هالجمله تدور ف راسه و تم ساكت فتره ...

خالد: دامك مب متأكد انها تحبك ليش مسوي كل هالحشره؟؟
سيف: مب مشكله ... الحب ايي عقب الزواج ... ياما ناس تزوجو بدون ما يعرفون بعض و عاشو مستانسين ...
خالد: ودر عنك كلام المسلسلات اللي ما ينفع و فكر في اللي قلته عدل ... و الحين اسمحلي اتأخرت على ناصر ...
سيف لخالد اللي كان متجه صوب الباب: و انا بعد اباك تفكر باللي قلته ...

خالد كان عاطي سيف ظهره و متوجه صوب الباب يبا يظهر ... و في نفس الوقت كلام سيف و سؤاله اذا كان فعلاً يحب اسما ولا أنانيته مخلتنه يحبها غصبن عنه يرن في راسه ... بس في الآخر قرر يبعد هالافكار عنه ...

*~*~*~~*~*~*

[أريج الورد]

تابع الجزء الثالث



%% الخميس 5:00 العصر %%

" هووود هووود يا هل البيت " ...

ام حميد: يا مرحبا بو راشد ... اتفضل دش الميلس ...
بو راشد من ورا اليدار قبل ما يدش الميلس: دام فضلج يا ام حميد ...

ام حميد عقب ما اتأكدت انه بو راشد دش الميلس سارت تزقر البنات يسلمن على عمهن و عقب سارت المطبخ تزهب الفواله حق بو راشد ...

ين البنات سلمن على بو راشد و ردن حجرهن الا عايشه اللي فضلت تيلس وياه عمها و امها اللي يابت الفواله و حطتها عدال بو راشد ...

بو راشد: و شخبارج عايشه و شخبار خوانج و خواتج؟؟
عايشه: الحمدلله كلنا بخير ...
ام حميد: و ام راشد شخبارها ما يت وياك اليوم ...
بو راشد: كان ودها تي بس هي مب صاحيه اليوم ... بتيكم مره ثانيه ان شاء الله ...
ام حميد: ما تشوف شر ان شاء الله ...
بو راشد: الشر ما اييج يا ام حميد ...

يلس بو راشد شويه ويا عايشه و امها و قبل لا يترخص منهم طلع من بوكه خرده و مد ايده لعايشه ...

بو راشد: هذا لج و لخواتج ...
عايشه: مشكور ما قصرت يا عمي ... نحن مب محتايين ...
بو راشد: ترديني يا عايشه؟؟
ام حميد: يا بو راشد عندنا و عندكم الخير ...
بو راشد: بس بعد عيال المرحوم اخويه و لكم حق عليه ... ما يصير تردوني ...

من خلص بو راشد رمسته دش عليهم علي ياي من برع سلم على عمه و حبه ع راسه ...

علي: شحالك عمي؟؟ وينك ما قمنا نجوفك ...
بو راشد: انا دوم اييكم ... انته و اخوك ما تيلسون في البيت ...
علي و هو مفتشل من رمسة عمه: شو نسوي يا عمي من الملل ...
بو راشد: دورولكم على شغله تنفعكم بدال هالهياته اللي ما منها فايده ...
علي: ان شاء الله عمي ... الا اقول عمي لمنو هالبيزات؟؟
بو راشد: اختك مب طايعه تاخذهن عني ...
علي: هاتهم عنك انا بعطيها عقب ... تعرفها هي تستحي منك ...
بو راشد: انا عمها اشحقه كل هالمستحى ...
ام حميد بحزم: علي!!
بو راشد: برايه ... يود ابويه ...
علي قام حب عمه ع راسه: مشكور و ما قصرت عمي الله يطول لنا بعمرك ان شاء الله ...
بو راشد: تسلم ... يالله اترخص منكم الحين ... فمان الله ...
الكل: فمان الكريم ...

قام علي وصل عمه لين الباب ... و يا بيظهر عقب ما سار عمه ...

عايشه: تعال وين ساير؟؟
علي: و انتي شو يخصج؟؟ اسير وين ما ابا ...
عايشه: اول ييب اللي عندك؟؟
علي باستهزاء: نعم؟؟ عيدي اللي قلتيه ما سمعت ...
عايشه: اظن كلامي واضح ما يحتاي اعيده ...
علي: ليش ان شاء الله؟؟ عشان تخشينهم لج بروحج؟؟ اسمحيلي ماقدر فمان الله ...

ظهر علي عن عايشه بدون ما يعطيها فرصه ترمس ... اما عايشه تنهدت بضيج و سارت الصاله تيلس ويا امها ... هذا هو حال اخوانها حميد و علي ... الشي اللي يطيح في ايديهم مستحيل يخلونه خصوصاً البيزات ...

*~*~*~~*~*~*

%% 5:45 العصر %%

في بيت بو سالم بالتحديد ... شمسه (ام سالم) كانت يالسه في الصاله هي و مريم ... اليازيه و نوف ين من حجرهن يلسو عدال بعض و تمن يصاصرن ...

شمسه: قولن اشعندكن ... ماله داعي هالمصاصر كله ...
اليازيه: امايه فديت روحج نبا نسير بيت قوم خالوه ...
شمسه: أي خاله فيهن؟؟
نوف: خالوه سلامه طبعاً ... من متى تحيدينا نسير بيت خالوه ليلى ...
شمسه: ويدي ... امس يايينا ... وين بتسيرن هناك بعد؟؟
مريم: لا تخلينهن يسيرن ... اكيد يبن يظهرن ...
شمسه: لالالا ظهره ماشي ... جان بتيلسن هناك ماعليه ...
اليازيه تحاول تقنع امها: انزين خالوه سامحتلنا نظهر ... انتي ليش ما تبينا نظهر؟؟
مريم لامها: جفتي؟؟ يوم اقولج وراهم ظهره طلع شكي في محله ...
نوف: انتي لا تيلسين تفرين راس امايه ... ما يخصج ...
شمسه: نوف عيب هاي اختج العوده ...
اليازيه: انزين ماعليج من نوف ... بس بليز خلينا نسير ... نبا نتونس شوي قبل ما نبدا نذاكر حق الامتحانات ...
نوف: هاه امايه شو قلتي؟؟
شمسه اتأففت: بس سيرن ولا تصدعن لي راسي ...
اليازيه حبت امها ع راسها: فديتج يا احلى ام في الدنيا كلها ...
شمسه: خلي عنج المجاملات و سيري ازهبي بسرعه ... ان اذن المغرب و انتن بعدكن في البيت ماشي سيره ...
اليازيه: ان شاء الله ...
شمسه لليازيه قبل ما ادش حجرتها: و خفي المكياج لو سمحتي ...
اليازيه بصوت عالي: ان شاء الله ...

*~*~*~~*~*~*

%% الساعه 6:40 قبل المغرب %%

" لا حبيبتي اليوم بظهر ويا بنات خالاتي و بنات عمهم ... اوكي اجوفج هناك عيل ... باي " و سكرت الخط ...

عفرا: هاي بعد لاحقتنا لين هناك؟؟
امل: و انتي شو يخصج؟؟
عفرا: مادري كيف مستحملتنها؟؟
امل: بس بس الله يخليج اكرمينا بسكوتج ... بسير ابدل احسلي ...
عفرا: بسرعه خلصي لو سمحتي اتأخرنا عليهم ...

*~*~*~~*~*~*

%% الساعه 7:10 المغرب %%

" انتو وينكم يالله تأخرنا ... خلاص عيل نحن بنظهر و بنتلاقى وياكم هناك ... يالله باي "

محمد و هي ياي من حجرته: انتو بعدكم ما سرتو؟؟ شو تتريون؟؟
أسما: الحين ظاهرين ... هاي امول مأخرتنا ... يالله نشن شو تترين بعد؟؟
محمد: لحظه لحظه ... تعالي انتي وين سايره؟؟
اليازيه: سايره وياهم بعد وين بسير؟؟
محمد: و حضرتج بتسيرين جي؟؟
اليازيه: ليش ان شاء الله؟؟ تشوف فيني شي غلط؟؟
محمد: انتي بكبرج اصلاً غلط ... سيري مشي هالخرابيط اللي ع ويهج ... " و التفت صوب اسما " و انتي عطيها شيله عدله بدال هالمصخره اللي حاطتنها ع راسها ...
أسما: محمد مب وقته هالرمسه ...
محمد بدا يعصب: الا وقته و نص ...
اليازيه: ما يخصك ... دام هلي ما قالولي شي انت تسكت ...
محمد بعصبيه: تعالي صفعيني بعد؟؟
أسما تصاصر اليازيه: قومي و بلا فضايح ...

نشن أسما و اليازيه سارن حجرة أسما ...


|| في حجرة أسما ||

أسما كانت عافسه الكبت تدور شيله تناسب اللبس اللي لابستنه اليازيه و مب محصله ...

اليازيه شويه و بتصيح: بس خلاص أسامي ماله داعي اتعبين عمرج انا مب سايره ...
أسما: ماشي ... بتسيرين و ريولج فوق راسج ...
اليازيه: مابا اسير ...
أسما: و ان شاء الله بتيلسين ويا منو هني؟؟
اليازيه: ما عليه عقوني البيت و انتو ظاهرين ...
أسما: هيه ... عشان تستلمنا خالوه بالتحقيق ... احمدي ربج انه امايه محد ولا السالفه بتوصل المحاكم ...
اليازيه: ماعليه انا بتصرف وياها ... بس هالسيره مب سايره ...
أسما: يالله عاد يزوي عن السخافه ... تبيني اتم ويا منو يعني؟؟
اليازيه: اختج و بنات خالتج وياج ... و بعد بنات عمج سيري ويا أي حد ...
أسما: يالله يالله بتسيرين يعني بتسيرين ... تدرين اني ما اتأقلم ويا ريموه و بنات عمي ...
اليازيه: انزين قوم امول وياج ... مافيها شي ...
أسما: يزوي تراني انا اللي بصفعج هالمره ...
اليازيه: انزين خلاص خلاص لا تسويلنا شرات اخوج انتي بعد ...
أسما: ههههههههههههه جي اباج ... يالله قومي عدلي مكياجج اللي اخترب بس يا ريت تخففين منه شوي ...
اليازيه: اوكي ...

و عقب ما حصلت أسما شيله مناسبه لليازيه و عقب ما عدلت مكياجها و خففته ظهرن البنات سارن السيتي عشان يدشن السينما و يتعشن هناك مره وحده و هناك تلاقن ويا امل و عفرا و ميثا ربيعت امل ...


*~*~*~ نهاية الجزء الثالث ~*~*~*

[أريج الورد]

*~*~*~ الجزء الرابع ~*~*~*


%% الجمعه 9:30 الصبح %%

في بيت بو محمد بالتحديد ... الكل كانو موجودين في غرفة الطعام يتريقون ...

سلامه ( ام محمد ): محمد ابويه ... رمستني امس خالتك ...
محمد قاطعها: ادري عن شو بترمسين ... تستاهل اللي ياها ...
سلامه: جان رمستها بالهداوه؟؟
أسما: لو جفتيه امايه كيف انهد عليها جدام بنات عمي ... حتى تمت تصيح واعليه عليها ...
بو محمد: أسما بس ... امج ترمس اخوج الحين ...
أسما: ان شاء الله ...
سلامه: يعني حتى لو جفت عليها شي غلط رمسها بالهداوه مب جي تنهد عليها مره وحده ...
محمد: ياما رمسناها بالهداوه ما سمعت الرمسه شسويلها يعني؟؟
سلامه: رمس خالتك و هي بتتفاهم وياها ...
محمد: ان شاء الله ... "و نش من ع الطاوله" الحمدلله ...
سلامه: وين؟؟ ما كلت شي ...
محمد: بس انسدت نفسي ...
سلامه تنهدت: الله يهديك يا ولدي ...

*~*~*~~*~*~*

%% الساعه 10:00 فليل %%

في سيارة خالد ...

ناصر: و انت شو ناوي تسوي الحين؟؟
خالد: خلها على الله ...
ناصر: دامك مب مستعد لهالشي ليش مصرّ عليه؟؟
خالد بانفعال: قلتلك اني مب مستعد؟؟ الحمدلله ما عليه قصور اقدر اعرس في أي وقت ...
ناصر: هههههههه انزين اعصابك شوي شوي علينا ... ادري ما عليك قصور بس ما اتوقع انك ممكن تتخلى عن حريتك في سبيل الزواج ...
خالد: لا والله؟؟ و انا باخذ حرمه ولا سجانه؟؟
ناصر: خلود انا اعرفك عدل مثل ما اعرف نفسي ... و تفكيرك ما يختلف عن تفكيري فلا تحاول تقص عليه بكلمتين ... و دامه بيموت عليها رخصها له ...
خالد: نصور ... اسكت الله يخليك ... تراك صدعتلي راسي بهالسالفه ...
ناصر: هههههههههههههه انزين خلاص ... بس سؤال اخير ...
خالد تنهد بضيج: شو عندك بعد؟؟
ناصر: انت تحبها؟؟
خالد باستهزاء: لا تبدا بسخافاتك انته الثاني ... كفايه سيفوه ...
ناصر: انزين خلاص آسفين ع السؤال ... ندري انك تموت فيها ...
خالد: انت ما يخصك احبها ماحبها كيفي ...
ناصر: انزين بس بس كلتنا ... حشى يا بوك ما صارت اسوم هاي اللي جي خلتك تلبق علينا مره وحده ...
خالد: بتصطلب انته ولا شو؟؟
ناصر: اسمحلي والله نسيت عمري ... اقصد الشيخه أسما ...

خالد تم يطالع ناصر من طرف عينه ولا رد عليه ...

*~*~*~~*~*~*

%% السبت 10:30 الصبح %%

" حياك الله يا بو حمد ... اشوفك عقب نص ساعه ... فمان الله " و سكر الخط ...

ظهر عبدالله من مكتبه عقب ما خلص من المكالمه و اتفاجأ بوجود ليلى ويا السكرتيره ...

عبدالله: انتي شو تسوين هني؟؟
ليلى: يايه اطمن عليك ... حرام؟؟
عبدالله: انا بخير الحمدلله تقدرين تتفضلين الحين ...
ليلى: اول قول لي وين ساير؟؟

عبدالله لاحظ انه السكرتيره تسوي عمرها تشتغل و اذنها عندهم ... سحب ليلى برع المكتب و طلب من السكرتيره تلغي كل المواعيد الين يرد ...

عبدالله: انا كم مره قايلج لا تين هني؟؟ حق الفضايح مافي احسن عنج ...
ليلى: انزين هدني ... انت اللي بتفضحنا جدام الموظفين ...

و هم ظاهرين منصور كان توه ياي من برع ...

منصور: ماشالله مسوين عزيمه في الشركه ...
عبدالله: و انت وينك من الصبح؟؟ الدوام يبدا 8 و حضرتك توك تشرف؟؟
منصور: كنت تعبان ... و بعدين ما يخالف لو ايي عقب الدوام انا ولد صاحب الشركه و محد يقدر يقولي شي ...
عبدالله: انزين بسك من الرمسه الفاضيه و سير جوف شغلك ...
منصور: الصراحه مالي خلق ايلس في المكتب ... اقول لو اخاويك احسن ...
عبدالله: ما يحتاي حد يخاويني و سير جوف شغلك احسلك ...
ليلى من طرف خشمها: هاه منصور؟؟ شحالها امك؟؟
عبدالله و هو يدزها: يالله اجوف جدامي ...

ليلى اتأففت بضيج و ظهرت هي و عبدالله من الشركه و منصور تم واقف مكانه ...

محمود: صباح الخير استاز منصور ...
منصور: صباح النور ... تعال مكتبي اباك ...
محمود: معليش استاز بخلص شغله صغيره و بجيك ...
منصور: خلها بعدين اباك ضروري ...
محمود: ان شاء الله استاز ثواني بس ...

*~*~*~~*~*~*

%% الساعه 11:10 الصبح %%

وقت الفسحه في احد المدارس الثانويه ...

امل: ميثوه قلتلج انا ما يخصني في هالسوالف ...
ميثا: انزين انا ابا اعرف انتي من شو زايغه؟؟
امل: لا والله؟؟ و اذا حد درى؟؟
ميثا: انا من سنتين ارمس محد درابي انتي بيزخونج؟؟
امل: انتي غير و انا غير ...
ميثا بانفعال: في شو غير؟؟ ام 24 ساعه عند ربيعاتها و ابو في الشغل طول اليوم ... في شو غير بالله عليج؟؟
امل: عاد انتي ماعندج اخوان ولا خوات ... و انا عندي اثنينه و نصور تراج تعرفينه كيف غلس ...
ميثا: صدقيني ما بيدرون ... و الصراحه هو من جافج و هو ميت عليج ...
امل بطات عيونها: لا والله؟؟ و هو وين جافني عشان اعيبه؟؟
ميثا: جافج في السيتي هاك اليوم ...
امل بانفعال: انتي اتخبلتي تقولين لربعج يلحقونا؟؟ و اذا حد لاحظ؟؟
ميثا: لا تخافين محد لاحظ ...
امل: انزين بس فكينا من هالسالفه الفسحه خلصت و ما تهنينا ...
ميثا: كيفج انتي الخسرانه ...

*~*~*~~*~*~*

%% الساعه 3:00 الظهر %%

في بيت بو سيف ...

ظبيه (ام سيف): جليثم امي قومي اتصلي بابوج ولا اخوج اطالعيهم وين ...
جليثم: ان شاء الله ...
بو سيف + سيف: السلام عليكم ...
ظبيه + جليثم: و عليكم السلام و الرحمه ...
جليثم: اكم يو ما يحتاي اتصل ...
بو سيف: ليش سيف ما خبركم نحن بنتأخر؟؟
سيف: اوه نسيت والله ...
جليثم: وين كنتو؟؟ ترييتكم عشان اتغدى معاكم ...
بو سيف: اتأخرنا شوي في الشغل ...
جليثم: بسير ازهب الغدا ... لا يكون تغديتو عني؟؟
بو سيف ابتسم: لا ما تغدينا ...
سيف: انا ما اشتهي ... بسير حجرتي ارتاح ...
جليثم: كيفك ...

سارت جليثم المطبخ تحط غدا لها و لبوها و سيف سار حجرته و ما تم حد في الصاله غير بو سيف و ام سيف ...

ظبيه: مب من عوايده يأخركم بو سالم ...
بو سيف: اكتشفنا تلاعب في الحسابات عشان جي تأخرنا عشان ندقق عليهم ... و تعرفين بو سالم خبرته مب لين هناك في التجاره و الاعتماد كله عليه انا و سيف ...
ظبيه: عيل عياله وين؟؟
بو سيف: سالم مب ظاري يتأخر في الدوام وايد ... رد البيت ... و خالد تحيدينه يالس في البيت ...
ظبيه تنهدت: يا ريت عاد يبين في عيونهم هالكد الي تكدونه ...
بو سيف: دام بو سالم واثق فينا ما علينا من حد ...
جليثم: ابويه الغدا زاهب ...
بو سيف: يالله ياي ...

سار بو سيف يتغدى ويا جليثم و ما وحاله خلص من الغدا اذن العصر سار يصلي و رد البيت ...

*~*~*~~*~*~*

[أريج الورد]

%% الساعه 10:00 فليل %%

" توه الناس ... جان ما ييت احسن؟؟ "

عبدالله: ما يحتاي اقولج اني غرقان بالشغل ... انتي بروحج لازم تعرفين هالشي ...
ليلى: غرقان بالشغل ولا لاهي ويا السكرتيره اليديده؟؟
عبدالله: لا حول ولا قوه الا بالله ... انتي متى بتيوزين عن سوالفج؟؟
ليلى: يوم انته بتصطلب و بتودر عنك هالحركات ... تتحراني غافله عن سواياك؟؟ انا اعرفك زين ... ادريبك ناوي تاخذها شرات اللي قبلها ...
عبدالله بعصبيه: و بعدين وياج؟؟ و يكون في علمج انا اذا قررت اعرس لا انتي ولا عشر من امثالج يقدر يمنعني ... تفهمين؟؟
ليلى بانفعال: و بعد بتظهر؟؟

عبدالله ما سوالها سالفه و ظهر من الحجره و اتفاجأ بوجود عياله متيمعين عند باب الحجره ...

عبدالله: انتو شو تسوون هني؟؟
ناصر: اللي تشوفه ...
عبدالله: و انتو من متى تصوخون من ورى البيبان ...
امل: ما يحتاي نتصوخ ... اصواتكم تنسمع لين الشارع ...
عبدالله لعفرا اللي متسمره مكانها و الخوف بادي على ملامحها: و انتي ما عندج شي تقولينه شرات اخوانج؟؟

انصدمت عفرا من رمسة ابوها و ربعت على حجرتها تصيح و امل لحقتها ... اما عبدالله ظهر من البيت محرج و ناصر دش حجرته اسبح و ظهر كالعاده ...


|| في حجرة عفرا ||

امل: بس خلاص الين متى بتمين تصيحين؟؟
عفرا مب رايمه ترمس من الصياح: هاي اول مره يصرخ عليه ... ليش جي يرمسني؟؟
امل: اتعرفين ابويه كيف يوم يحرج ... و بعدين هو كان محرج علينا كلنا مب بس انتي ...
عفرا: مب بس هذا اللي قاهرني ... ماحب اجوف امايه و ابويه يضاربون و انا ساكته و ما بيدي شي ... الله يعلم امايه شو حالها الحين ...

امل اتفاجأت من رد عفرا و حز في خاطرها انهم حتى ما فكرو يوقفون امهم و ابوهم يوم كانو يضاربون و حتى ما سارو يواسون امهم ...

امل: خلاص انتي رقدي الحين و ان شاء الله باجر الصبح بجوفينهم على احسن حال ...

عفرا ما اعترظت على كلام امل ... و سارت ترقد على طول ...

و في الطرف الثاني ... ليلى باتت طول الليل على اعصابها تتريا عبدالله يرد في أي وقت لكنه ما رد ...

*~*~*~~*~*~*

%% الاحد 6:00 العصر %%

" امايه مب جنهم تأخرو؟؟ "

موزه: صبري و انتي شو عايلنج؟؟ اكيد أخروهم شويه في المطار ...
منال: يالله يا حمدان اشكثر ولهت عليك ...
عنود: ماظني ولهتي عليه ... الا ولهتي ع اللي بييبه حمدان ...
منال: جب جب انتي محد رمسج ...
موزه بحزم: منال .........................
منال قاطعت امها: ادري ادري ... احترمي اختج العوده ... مليون مره سامعينها هالسيمفونيه ...
موزه: وبعدين وياج؟؟
منال: خلاص انزين سكتنا ...

...... : السلام عليكم ...

التفتو كلهم صوب مصدر الصوت بس خابت توقعاتهم ...

منال: حسبي الله على بليسك يا سلطون ... تحريتك حمدان ...
سلطان: لا والله؟؟ و انا مب تارس عينج؟؟
منال: انته ويانا 24 ساعه شبعنا من شيفتك ...

سلطان سار صوب منال و قبض ايدها بسرعه و تم يلويها ... اما منال حاولت تسحب ايدها بس سلطان كان اسرع منها و تم يرص على ايديها ...

منال و هي تتألم: بس بس غربلات بليسك عورتلي ايدي ...
سلطان شوي رخى ايدها: قولي التوبه ماعيد هالرمسه مره ثانيه ...
منال بعناد: مب قايله ...
سلطان رد لواها اكثر: بسرعه ولا ايدج هاي بتنشلع ...
منال تتوسل امها: امايه قوليله يهدني ...
موزه: بس يا سلطان هد اختك ...
سلطان: مب هادنها الا يوم بتوب ...
منال عقب ما فقدت الامل انه يهدها: افففف خلاص التوبه ...
سلطان: هيه جي اباج ...
موزه: عمركم ما بتعقلون انتو الثنينه ...
منال: ولدج سخيف شسويبه يعني؟؟
موزه فرت منال بالمخده مالت الغنفه: بس بس انتي ... انا اقول العوده هي العاقله ... ظهرت اين من الصغير ...

و في هاللحظه دش عليهم حمدان و ابوه يايين من المطار ...

حمدان + بو حمدان: السلام عليكم ...

منال ما صدقت من جافت اخوها على طول ربعت صوبه و لوت عليه ...

منال بوناسه: الحمدللله ع السلامه ... مبروك التخرج ...
حمدان: الله يسلمج من الشر و يبارك في حياتج ...
منال: حمداني والله تولهت عليك ...
حمدان: انا بعد تولهت على خبالج ... بس ممكن تهديني شويه بسلم ع الباقين ...

و بعد السلامات يلسو كلهم يسولفون ...

منال: اقول حمداني حياتي؟؟
حمدان: ما يبت شي ...
سلطان يغايض منال: وييييو عطوها في الويه ...
منال: جب جب انته ... انا ارمس حمدان انته اشلك تدخل؟؟
سلطان بتهديد: لا تخليني انش لج شرات قبل شويه ...
بو حمدان: بس يا عيال ... انتو متى بتيوزون عن هاللعب؟؟
منال: قول حق ولدك ...
سلطان: لا والله؟؟ هي اللي دوم تتحرش فيني ...
موزه: بس خلاص عاد طبو هالسالفه ...

و هذي كانت حالتهم في بيت بو حمدان ... مرتبشين بردة حمدان من صوب ... و المناقر بين منال و سلطان من صوب ثاني ...

*~*~*~~*~*~*

%% الاثنين 2:15 الظهر %%

حزة الغدا في بيت بو سيف ...

بو سيف: حمدان وصل بالسلامه امس ...
ظبيه: الحمدلله ع سلامته ...
بو سيف: ترى العشا ببيت موزه يوم الاربعا ...
ظبيه: شخبارها موزه (موزه اخت بو سيف و بو محمد من الام )؟؟ من زمان ما سمعنا حسها ولا سرنا صوبها ...
بو سيف: الحمدلله طيبه و تسلم عليكم ...
ظبيه: الله يسلمها من الشر ان شاء الله ...
بو سيف: سيف ابويه ... عقب ما تخلص من الغدا بتحصل اوراق في حجرتي بغيتك توديهن لبو سالم العصر ...
سيف: ان شاء الله ...
ظبيه: على طاري بو سالم ... ما قلتلي شو سويت ويا خالد؟؟

سيف تضايج يوم ذكر السالفه و ما رد على امه ... و هي حست بضيجته ...

ظبيه: قلتلك توكل على الله و خلني اخطبلك ما طعتني ...
بو سيف: ظبيه مب وقته هالرمسه ...
سيف: خلها يابويه ... انا خلاص يأست من هالسالفه ...
ظبيه ابتسمت: هاه خلاص؟؟ ولا يهمك عندي اللي احسن من أسما و عشر من أمثالها ...
سيف بضيج: اسمحيلي امايه بس انا مابا اعرس الحين ...
ظبيه بخيبة امل: عيل متى يا ولدي؟؟ نبا نفرح فيك و نغايض اللي خبري خبرك ...
بو سيف: ظبيه الله يهداج شو رمسة اليهال هذي؟؟ الحين انتي تقولين جي؟؟ شو خليتي حق اليهال عيل ...
ظبيه: من ضيجتي يا بو سيف شسوي ...
سيف تنهد: ماله داعي تضايجين روحج على سالفه ما تسوى ... و ان شاء الله بعرس و بخليج انتي تخطبيلي بعد بس مب الحين ... و يا ريت ما ترمسيني في هالموضوع مره ثانيه ...
ظبيه تنهدت بضيج: اللي يريحك يا ولدي ...

*~*~*~~*~*~*

%% الساعه 4:30 العصر %%

شلت الموبايل اللي كان يرن بطريقه مزعجه و ردت على المتصل بدون ما تشوف الرقم ...

الريم بصوت متروس رقاد: الوووه ...
جليثم: و العثره بلاه صوتج؟؟
الريم: راقده يعني كيف تبينه يكون ...
جليثم: جوفي الساعه كم ... بس رقاد لا صلاه ولا عباده ...
الريم: انزين بندي عشان اسير اصلي ...
جليثم: انزين ... المهم بغيت اقولج ترى يوم الاربعا العشا ببيت عموه موزه عسب يية حمدان من السفر ...
الريم باستغراب: اونه؟؟ متى صار هالشي؟؟
جليثم: ليش؟؟ ما خبركم عمي؟؟
الريم: لاء ...
جليثم: يمكن نسى السالفه ...
الريم: والله مادري ... كل شي جايز ...
جليثم: خلاص عيل بخليج الحين ... و نشي سيري صلي ..
الريم: هههههههه .... ان شاء الله ...

*~*~*~~*~*~*

%% الساعه 8:30 فليل %%

في هالوقت و كالعاده ... ليلى كانت في بيت ربيعتها ناهد و يالسه تشكي لها همومها ...

ليلى تنهدت بضيج: تخيلي انه من يومين ما رد البيت ولا حتى اتصل ...
ناهد: يعني عقب الكلام اللي سمعتيه اياه اكيد بيزعل و ممكن يسوي اكثر من جي ...
ليلى: انا الحين اشكيلج همي اباج تخففين عليه و انتي تزيديني هم؟؟
ناهد: هاي الرمسه اللي المفروض تسمعينها ... عاد انتي الله يهداج وايد عصبيه تحرجين على اتفه الاسباب ...
ليلى: عيل يلعب من وراي و اسكت له؟؟
ناهد: يعني بالله عليج لو بياخذ سكرتيرته بيخليها في المكتب يعني؟؟
ليلى: عادي يسويها ... يتحراني غبيه و ما بكتشف هالشي ...
ناهد: اسمحيلي يا ليلى بس الظاهر انتي الغلطانه ... شكوكج هاي هي اللي خلت ريلج يطفش و يظهر من البيت ... فأنا اقول لو تعتذريله احسن ... و يا ريت تتفاهمين وياه بالهداوه ...
ليلى باستهزاء: الحين انتي تعلميني كيف اتعامل ويا ريلي؟؟ حبيبتي لو فيج خير جان حافظتي ع ريلج ... على العموم مشكوره و ما قصرتي ... مع السلامه ...
ناهد تنهدت بضيج: حافظنج الرب ...

ظهرت ليلى من عند ناهد محرجه و على طول توجهت الى البيت ...

*~*~*~~*~*~*

%% الثلاثا 11:55 الصبح %%

في بيت بو سالم ... ما كان حد في البيت غير ام سالم و مريم عقب ما سارن البنات لمدارسهن و بو سالم و سالم سارو الشركه ... خالد كعادته اليوميه راقد في هالوقت و ما ينش الا قبل الغدا بنص ساعه ... عاد هالمره شمسه ما خلته يتم ع هالحال و سارت توعيه ... تمت ادق الباب كمن مره و تزقره الين فج الباب و رد ينسدح ع الشبريه ...

شمسه: عنبوه انته ما تشبع رقاد؟؟ بسك الين متى بتم جي؟؟
خالد بتعب: امايه الله يخليج خليني ارقد ... تعبان و مالي بارض انش ...
شمسه بقلق: شو فيك خالد؟؟ شي يعورك؟؟
خالد: ما فيه شي ... بس ابا ارقد لا توعوني ...
شمسه: انزين قوم بغيتك بسالفه ...
خالد بضيج: ما تأجلين السالفه شوي؟؟ قلتلج تعبان و ابا ارقد ...
شمسه: استح ع ويهك ... انا امك جي ترمسني؟؟
خالد عقب ما نفد صبره: اووووووووووووه و بعدين وياج يعني؟؟ قلنالج نبا نرقد شو ما تفهمين؟؟ <<< و لف عنها الصوب الثاني و لحف راسه ...
شمسه انصدمت: خلود يا مسود الويه ما عليه حسابك عندي بعدين ...

ظهرت شمسه من حجرة خالد محرجه و مصدومه في نفس الوقت من رد خالد لها ... معقوله احب عيالها على قلبها يرد عليها جي!!

و عقب نص ساعه ...

نش خالد من الرقاد اتسبح و ظهر ... تنهد بضيج و هو مجابل الجامه ينشف شعر و تم هالكلام يدور بخاطره ...

" هذا وقته الحين تزعل؟؟ ماعليه بنراظيها بكم كلمه بترضى ... انا اللي ماعندي سالفه هبيت ف ويهها جي ... يالله شي صار و استوى و اكيد آخرتها بترضى "

ظهر خالد من حجرته سار الصاله ما حصل حد ... و في المطبخ البشكاره بس كانت موجوده سألها عن امه قالتله انها ما يت المطبخ ...

" وين سارت الحين؟؟ اكيد في حجرتها ... بسير اطالعها "

دش خالد البيت مره ثانيه و هو ياي من المطبخ و على طول اتجه صوب حجرة امه ... دق الباب ظهرتله مريم و سحبته برع الحجره عن يدخل ...

خالد بضيج: شو فيج انتي تخبلتي؟؟
مريم: انته شو سويت في امايه؟؟
خالد: ولا شي ... بلاها؟؟
مريم بضيج: و هي طايعه ترمس؟؟
خالد: قومي انا بروحي بجوف شو فيها ...

حاولت مريم تمنعه يدش على امها بس ما قدرت لانه دزها ...

خالد: امايه اسمحيلي والله ماقصدت ازعلج ... كنت راقد و ماعرف شو اقول ...
شمسه: ...............................................
خالد قرب منها و لوى عليها: امايه ارمسي قولي شي ... قلبي يتقطع و انا اجوفج جي ... الله يخليج سامحيني و هاي آخر مره اسويها ...
شمسه: بس يا خالد ... لا تسوي في روحك جي ... لو شو يصير ماقدر ازعل عليك ...
خالد و هو يحب راس امه: فديت روحج سامحيني هالمره و اوعدج ماعيدها ...
شمسه: بس خلاص انا شو قلت ...
خالد ابتسم: انزين خلاص بسكت ولا بقول شي ...

ردتله شمسه بابتسامه احلى و يلس خالد وياها شويه و ظهر عنها ...

*~*~*~~*~*~*

[أريج الورد]

%% الاربعا 6:30 العصر %%

في هالوقت بو سيف و مرته و عياله كانو توهم واصلين بيت بو حمدان ... موزه كانت مسويه عزيمه ع ردت حمدان من السفر ... و هم داشين تلاقو ويا حمدان و شكله كان مستعيل ... بس من جافهم سار يسلم عليهم و باركوله ع التخرج ...

بو سيف: وين ساير ماشالله؟؟
حمدان: الوالده بغت شوية اغراض من الجمعيه بسير اييبلها اياهن ...
بو سيف: خلاص برايك ابويه ما بنعطلك ...

دشو قوم بو سيف البيت ... بو سيف و سيف دشو الميلس ... و ظبيه و البنات يلسن في الصاله ...

حمده تصاصر جليثم: بلاج؟؟
جليثم تفاجأت: شو بلايه؟؟
حمده: قصري حسج انزين فضحتينا ...
جليثم بصوت واطي: شو عندج؟؟
حمده: بس هذي عموه يت ... في البيت بتفاهم وياج ...

*~*~*~~*~*~*

%% الساعه 9:30 فليل %%

" الحين يايبتني من البيت و اباك ضروري عشان تسإليني هالسؤال؟؟ "

ليلى: يعني اذا ما سألتك انت اسأل منو؟؟
منصور: انتي مرته ... يعني اذا بيسير مكان بيخبرج انتي ... انا ما يخصني فيه ...
ليلى: انزين هو ما ايي الشركه؟؟
منصور: امبلا ... ان كثر يلس ساعتين و ظهر ...
ليلى بصوت واطي: يالله برحمتك يا رب ...
منصور: شو؟؟ تسبيني و انا جدامج؟؟ قلتلج انا ما يخصني فيه اتصلي به و اسأليه هو وين ...
ليلى: غالق كل تلفوناته ...
منصور ياي بيروح: اسمحيلي يا ام ناصر ماقدر اساعدج ... دوري على غيري ...
ليلى: انزين و ابوك؟؟
منصور بضيج: اووووووووه ... دوريه روحج ... فمان الله ...
ليلى: انزين و اذا قلتلك اني بعطيك اللي تباه اذا حصلتلي اياه؟؟
منصور بخبث: متأكده؟؟
ليلى بتردد: هيه متأكده ... بس بشرط تنفذ اللي اباه منك ...
منصور رد يلس: كلي آذان صاغيه ... يالله قولي اللي عندج ...

و في الطرف الثاني من البيت ...

" شو نسوي بعد؟؟ مكتوب علينا الشقا ... برايج بخليج الحين بسير اطالع شو مشكلتها هاي ... باي "

تنهدت امل بضيج عقب ما سكرت عن ميثا ... ظهرت من حجرتها و توجهت لحجرة عفرا اللي من ظهر ابوهم من البيت و هي حالتها حاله ... دقت امل عليها الباب مرتين بس ما ردت عليها فقررت امل تدخل بدون استإذان ...

امل: لين متى بتمين حابسه روحج هني؟؟
عفرا: ..............................................
امل بضيج: ابا اعرف انتي شو مشكلتج؟؟
عفرا: اذا يايه تصارخين عليه ظهري من الحين و وفري كلامج لج ...
امل: ياختي انتي قهرتيني شو اسويبج يعني؟؟ لا الطيب اييب وياج فايده ولا الصراخ شو اسويبج يعني؟؟
عفرا بدون نفس: مشكوره و ما قصرتي ... مب محتايه حد يواسيني ...
امل: ههههههههههههه ... ظحكتيني والله ... ليش؟؟ منو ميت عندج؟؟
عفرا: ...........................................
امل: سوي اللي يريحج ... انا اللي عليه سويته بس انتي ما منج فايده ... جاو ...

ظهرت امل من حجرة عفرا ... و هي ظاهره تلاقت ويا امها في الممر ...

امل: في اخبار عن ابويه؟؟
ليلى: و من وين تبيني اييب الاخبار يعني؟؟
امل: عيل منصوروه اشحقه ياي؟؟ ماحيده يحبنا لهالدرجه عشان يزورنا بليا سبب ...
ليلى: املوه اسكتي عني ... بروحي واصله حدي ... اختج وين؟؟
امل و هي سايره حجرتها: مسويه مناحه في حجرتها سيري جوفيها لاني خلاص زهقت منها و من حركاتها الطفوليه ...

دشت امل حجرتها ... اما ليلى تنهدت بضيج و سارت تجوف عفرا ...

ليلى: ابوج حي بعده ما مات اشحقه هالصياح كله؟؟
عفرا: يعني عادي عندج يتم برع البيت كل هالفتره؟؟
ليلى: مب شي غريب عليه ... اعتبريه مسافر ...
عفرا: لو مسافر بنقول ما عليه تعودنا ... بس يظهر من البيت زعلان ولا ندري عنه تبينا نستانس؟؟ للاسف توقعتج خايفه عليه و طول الوقت كنت احاتيج و انتي ولا مهتمه ...

ليلى حز ف خاطرها الكلام اللي سمعته من عفرا ... بنتها تحاتيها و خايفه عليها و هي ولا مهتمه باللي صار؟؟

ليلى: يعني هذا رايج فيني؟؟
عفرا سكتت ولا ردت عليها ...
ليلى: على راحتج ...

ظهرت ليلى من حجرة عفرا و سارت حجرتها و هي تفكر برمسة بنتها عنها و في نفس الوقت ندمانه على تقصيرها في حق عيالها على الرغم من خوفهم عليها ...


*~*~*~ نهاية الجزء الرابع ~*~*~*

[أريج الورد]

~*~*~ الجزء الخامس ~*~*~*~*





%% الخميس 10:00 الصبح %%

في بيت بو سيف حجرة جليثم بالتحديد ... دشت حمده على جليثم اللي الين الحين راقده ... يلست حمده على طرف الشبريه و يرت اللحاف شوي عن جليثم ...

حمده: شو سالفتج اليوم؟؟
جليثم و هي تمط اللحاف: حمدوه فكينا من الصدعه ... ابا ارقد ...
حمده: الساعه عشر الحين ... الين متى بتمين راقده؟؟
جليثم: ما رقدت عدل امس ... لو سمحتي ظهري و سكري الباب ...
حمده: ان شاء الله ... ولا يهمج ...

نشت حمده بندت المكيف و فجت الدرايش ...

جليثم بضيج: انتي ايه ... شو تسوين؟؟
حمده: قلتلج نشي ... امايه تسأل عنج ...
جليثم: يعني ترومين تقوليلها اني راقده ...
حمده: ماقدر و بعدين عندي شي ابا اقولج اياه ...
جليثم حست باللي يدور ببال حمده: انزين خليني اسبح و بييج ...
حمده: ماشي بترياج هني ...
جليثم: كيفج ...

نشت جليثم من ع الشبريه خذتلها ثياب من الكبت و دشت الحمام تسبح و ظهرت عقب نص ساعه حصلت حمده يالسه مكانها ...

جليثم: بعدج يالسه؟؟
حمده: لا سرت و رديت ... اقول جليثم ...
جليثم بدت دقات قلبها تدق: شو عندج؟؟
حمده: شو سالفتج ويا حمدان؟؟
جليثم: بلاه حمدان؟؟
حمده: ماشي ... بس جفتج اعتفستي يوم دخلنا و هو كان ظاهر ...
جليثم: لا اعتفست ولا شياته ... انتي مخرفه ...
حمده و هي تطالع جليثم من طرف عينها: عليه انا هالرمسه؟؟ و نحن في السياره و انتي مستانسه و تضحكين و من وصلنا تغيرتي ... لا تتحريني ما لاحظت ...
جليثم: حمدوه ظهري عني احسلج ولا بهالنعال ع ويهج ...
حمده: ههههههههههههههه ... انزين خلاص بظهر ... كله ولا تزعلين ... كم جليثم عندنا ...
جليثم: انزين يالله فارجي ...
حمده و هي ظاهره: انزين بظهر ... بس برد لج عقب ...

*~*~*~~*~*~*

%% الساعه 4:00 العصر %%

" يا ربي انا شو سويت ... اكيد زعلت من اللي قلتلها اياه امس عشان جي ما رمستني ع الغدا ... انا لازم اعتذر منها ... بس مالي ويه احط عيني بعينها عقب هالسالفه "

هذا اللي كان يدور براس عفرا اللي كانت متلومه في امها من الرمسه اللي قالتها لها امس فليل ... ظهرت عفرا من حجرتها و توجهت لحجرة امها حصلتها طايحه ع الشبريه و شكلها تعبانه ...

عفرا بقلق: امايه شو فيج؟؟ شكلج تعبانه ...
ليلى و هي تعتدل بيلستها: ما فيه شي ... شو بغيتي؟؟
عفرا: ماشي ... خفت اتحريتج تعبانه ...
ليلى: ما عليج مني ... بس كنت افكر فيكم ...
عفرا بتردد: امايه انا آسفه ع الرمسه اللي قلتلج اياها امس ... اتمنى انج تسامحيني ...
ليلى ابتسمت برقه: لا تشيلين هم ... لو شو يصير ماقدر ازعل عليج ... انتي بنتي الصغيره الدلوعه ... و ادري اني مقصره وياكم وايد ...
عفرا ابتسمت لامها و لوت عليها: احبج ...
ليلى: و انا احبكم كلكم ...
عفرا: خلاص عيل بخليج ترتاحين الحين ...
ليلى: برايج ...

ظهرت عفرا عن امها مرتاحه و مستانسه لانها رضت عنها و انها شوي بدت تحس انها مقصره وياهم ... دشت حجرتها و اتفاجأت بوجود ناصر هناك ...

عفرا: انته شو تسوي هني؟؟
ناصر: ماشي بس بغيت ارمسج ... حرام؟؟
عفرا بضيج: لاء مب حرام ...
ناصر: انزين اعصابج علينا ... شو سويتلج انا؟؟

عفرا استغربت من هدوء ناصر وياها ...

عفرا بخاطرها: سبحان اللي يغير ولا يتغير ... معقوله هذا ناصر اخويه؟؟
ناصر لاحظ سرحان عفرا: حوووه وين سرتي؟؟
عفرا: هاه؟؟ ماشي ...
ناصر: شحالها الحين؟؟
عفرا باستغراب: منو؟؟
ناصر بتردد: امايه منو غيرها؟؟
عفرا: حالتها ما تسر عدو ولا صديج ... و السبب انتو و ابويه ... كلكم ظالمينها ...
ناصر: لو هي ما كانت مقصره ويا حد محد بيقصر وياها ...
عفرا: على الاقل اعترفت انها مقصره و ندمانه ع هالشي ... بس انتو الله يسامحكم مب راضين تعطونها فرصه تثبتلكم هالشي ...

ناصر استغرب من ردة فعل عفرا و تم يقول في خاطره ... " معقوله امايه حست فينا اخيراً؟؟ الحين عاد يا امايه؟؟ عقب شو؟؟ عقب ما ضيعتينا و ضيعتي نفسج ويانا؟؟ "

عفرا: ناصر انتو لازم تعتذرون منها ... و اتحسسونها انكم سامحتوها و نسيتو اللي صار ... انت ما جفتها كيف استانست عقب ما اعتذرت منها ...
ناصر بتحدي: تدرين انه هالشي مستحيل ... فات الاوان ع هالشي و صعب الامور تتعدل ...
عفرا: الصعب يتسهل ...

ظهر ناصر من حجرة عفرا بدون لا يرد عليها ... و في نفس الوقت يحس بمجموعه من المشاعر المختلطه ... معصب بسبة تقصير امه وياهم و في نفس الوقت مستانس انها اقرت انها كانت مقصره و ندمانه على التقصير ... بس مع هذا يحس انه بعيد عنها و مستحيل يقدر يسامحها ...

*~*~*~~*~*~*

%% الساعه 6:00 العصر %%

" بو محمد زعلان عليج ليش انج ما عزمتيهم ولا حتى خبرتيهم بردة حمدان من السفر "

موزه: تدري يا بو سيف لولا لسان سلامه مرته جان عزمتهم ... تعرفني لا اطيجها ولا تطيجني ...
بو سيف: و انتي اشعليج منها ... هو اخوج ولا سلامه؟؟
موزه: و بعدين انا بغيت اخبره بس نسيت السالفه ... بس ولا يهمك بستسمح منه و ما بيصير الا كل خير ...
بو سيف: عقب شو عاد الله يهداج؟؟ شو تبيني اقوله الحين؟؟ انج ما خبرتيه عشان مرته ...
موزه: لا تقوله شي ... انا برمسه ...
بو سيف: كيفج انتي تفاهمي وياه ...

*~*~*~~*~*~*

%% الساعه 10:00 فليل %%

في بيت بو سالم بالتحديد ...

شمسه: على وين يا حلو؟؟
خالد: بظهر ويا ناصر ...
بو سالم: تعال بغيتك ف رمسه قبل ما تظهر ...
خالد: ما يصير تأجلها؟؟
بو سالم: تعال ايلس انزين ما بناخذ من وقتك وايد ...
خالد: هاه ... يلست ... شو السالفه؟؟
بو سالم تنهد: متى ناوي تشتغل؟؟ نحن محتاجينك في الشركه ... بسك لعب ...
خالد بضيج: ابويه عاد هذا مب وقته ... باجر ان شاء الله بنرمس في الموضوع ...
سالم: خالد احترم ابويه ... يرمسك عشان مستقبلك و انته ولا مهتم في الموضوع ...
خالد: و انا قلتلكم ما بشتغل؟؟ والله بشتغل ... بس خلوني على راحتي الحين ... تونا مخلصين دراسه ما مدانا نتهنا ...
سالم: ابويه يقولك محتاجينك في الشركه و انته تبا تتهنا ... استح ع ويهك ...
خالد: سالم رجاءً لا تدخل ... المسأله بيني و بين ابويه ...
بو سالم: انا ويا سالم في اللي يقوله ...
خالد: على عيني و على راسي ... بس هذا مب وقته ...
سالم: الله يعين اسما عليك ... اونك ناوي تعرس ... شكلك بطول ...
خالد: العرس لاحقين عليه ... قول هالرمسه لنفسك ... شو تتريا الين الحين ما عرست؟؟
سالم تغير ويهه من طرا خالد سالفة العرس: و انته شو يخصك؟؟
خالد: خلاص عيل اسكت عني و انا بسكت عنك ... فمان الله ...

ظهر خالد من البيت و تمو بو سالم و شمسه و سالم في الصاله ...

شمسه: صدقه خالد ... شو تتريا؟؟
سالم بخاطره: غربلات بلسيك يا خلود ... هذا وقته الحين تذكرها بهالسالفه؟؟
شمسه: ارمس منو انا؟؟
سالم: هاه؟؟ ماشي ...
شمسه: بسم الله ... بلاك تدودهت جي؟؟
سالم: ما فيه شي ... تصبحون على خير ...
شمسه + بو سالم: و انته من اهله ...
شمسه: بلاهم عيالك استخفو؟؟
بو سالم: تسإليني عنهم؟؟ عيالج و انتي ادرى فيهم ... تعرفينهم مب مال عرس ... لا البنات منهم ولا الشباب ...
شمسه بانفعال: بسم الله على عيالي ... يا حظهم اللي بياخذونهم ... يسدهم انهم بيناسبونا ...
بو سالم تنهد: هييييه ... هالغرور هو اللي مخرب عليكم انتي و عيالج ... ولا شي بيضيعكم غيره ...
شمسه: هذا مب غرور ... هاي عزة نفس ... مب شرات بعض الناس اللي يلمون ناس مب كفو و يولونهم اللي وراهم و جدامهم ...
بو سالم و هو يطالع شمسه من طرف عينه: شو تقصدين؟؟
شمسه: انت تدري انا شو اقصد ... ما يحتاي تسأل ...
بو سالم: والله يا ام سالم انا لو مب واثق ف بو سيف جان ما خليته شريك وياي ... و بعدين هالشركه اللي تجوفينها ما قامت الا من عقبه ... و بعد لج ويه تحطين من قدره؟؟
شمسه: هيه معروف ... مسويلك سحر ولا ما بتستوي طيب وياهم جي ...
بو سالم نش من مكانه: لا حول ولا قوة الا بالله ... بعد ردينا ع سالفة السحر؟؟ تصبحين على خير ...
شمسه بضيج: و انته من اهله ... ادري ... الصدج لازم بتزعلون منه ... بس ماقول الا الله لا يوفج اللي كان السبب ...

سار بو سالم عن شمسه حجرته و هو مضايج من رمستها عن بو سيف ... من يوم بو سالم كتب نص الشركه باسم بو سيف و شمسه معترظه على هالشي و قامت تحقد على بو سيف و عايلته ... و طبعاً بو سالم ما سوى جي الا عشان يرد الجميل لبو سيف بحكم انه الشغل اكثريته عليه هو و سيف و لانه بو سالم ما كان يفهم بالتجاره وايد ... و عياله ما كان لهم دور بارز في تطوير الشركه ...

بس منو يقول شمسه بترضى؟؟ بالعكس اعلنت الحرب عليهم و حرضت اختها سلامه اللي هي حرمة بو محمد اخو بو سيف على بو سيف و هي شراتها صارت ما ادانيهم ...

*~*~*~~*~*~*

%% الجمعه 2:30 الظهر %%

" الين متى بتم تتهرب مني؟؟ من هاك اليوم و انا ابا ارمسك و انت تتهرب ... مع هذا خليتك براحتك بس الحين لاء "

مايد يحاول يتحاشى نظرات راشد اللي موجهه له بحد: انا ما تهربت منك ... انته اللي كنت تي في وقت مب مناسب ...
راشد: انا مب ياهل تقص عليه بكلمتين ... حالك من هاك اليوم مب عايبني ... شو فيك؟؟
مايد: أي يوم؟؟
راشد: تعرف ما يحتاي اقولك ...
مايد بتردد: جفت ناس ما ارتحت لوجودهم ... واحد كنت اجوفه في لندن ...
راشد: قالك شي؟؟
مايد: لاء ... بس ما ارتحت له ... مادري اذا يدري عن ................................. <<<<< و سكت ...
راشد: و اذا درى شو بيصير؟؟
مايد: .................................................. .......
راشد: و اذا قلتلك اني دبرتلك شغله عندهم في الشركه ...
مايد انصدم: شووووه؟؟ انته تخبلت؟؟ ما حصلت مكان غير شركتهم؟؟ و بعدين قلتلك مابي اشتغل قبل ما اخلص دراستي ...
راشد: انا تعمدت هالشي ... و صدقني هالشي لصالحك و الدراسه لاحق عليها ... هاه شو قلت؟؟
مايد تنهد: اللي تجوفه ... بس بشرط ما يحطوني في نفس المكان وياه ...
راشد: ان شاء الله خير ... المهم سالم يباك تمر عليه باجر عشان تتفقون على كل شي ... و خل عنك الوسواس ...
مايد: ان شاء الله ...

*~*~*~~*~*~*

%% الساعه 7:00 المغرب %%

في هالوقت في بيت بو محمد ... شمسه كانت مسيره على اختها سلامه و البنات كانن وياها و خالد هو اللي وصلهن و دش وياهن يسلم ع خالته ... شمسه و مريم و خالد يلسو ويا سلامه و محمد اللي كانو في الصاله ... و باقي البنات عقب ما سلمن على خالتهن سارن عند اسما و الريم ...


|| في حجرة اسما ||

اليازيه: لو جفتي اخوج كيف يطالعني ... شويه و بياكلني بعيونه ...
أسما: و مستانسه بعد؟؟
اليازيه: خليه يموت من الحره ... ما يروم يسوي شي ...
أسما: انتي ما بيضيعج الا عنادج ... احمدي ربج انه ما صفعج هاك اليوم ...
اليازيه باستهزاء: يخسي الا هو يصفعني ... منو هو عشان يتحكم فيه؟؟
أسما: يزوي طيعيني و ودري عنج هالحركات ... و بعدين صدقه انتي وايد تبالغين بمكياجج ...
اليازيه: اجوف وقفتي بصف اخوج ... انزين ما عليه جوفي منو بيوزج خلود ...
أسما: لا والله؟؟ اونج تهددين؟؟
اليازيه: هيه طبعاً ...
أسما: لو شو تسوين ما تقدرين ... خالد يحبني و مستحيل يغير رايه ...
اليازيه: انزين بنجوف ... صبري ان ما خليته يهون و يخلي سيف ياخذج ماكون انا يزوي ...
أسما باستنكار: عن سيفوه و غيره ... خالد بياخذني انا و بس ...
اليازيه: و سيف بلاه؟؟ ماشالله عليه مال و جمال و اخلاق شو تبين اكثر عن جي؟؟
أسما: خذيه انتي دام انه عايبنج ...
اليازيه: خليه يلتفتلي و انا ما بقول لاء ...
أسما: يا السباله ... ما تنعطين ويه ... تبينه سيري بروحج ربعي وراه ...
اليازيه: حشى عليه ... بعدني ما صرت راعية سوالف ...
أسما: عيل سكتي عني و انا بسكت عنج ...


|| في الصاله ||

خالد: خلاص عيل بخليكم الحين ...
سلامه: وين؟؟ توه الناس ما لحقنا نسولف وياك ...
خالد: في وقت ثاني ان شاء الله ... الحين الربع يتريوني ...
سلامه: خلاص برايك يا ولدي ... اللي يريحك ...
شمسه: لا تنسى تمر علينا ع الساعه عشر ...
خالد: ان شاء الله ... يالله فمان الله ...
محمد: اصبر بيي وياك ...
خالد: اترياك في السياره ...

ظهر خالد من الصاله و سار يتريا محمد في سيارته ...


|| في سيارة خالد ||

خالد: خبرنا ... وين تبا تسير؟؟
محمد: سير وين ما كنت بتسير ...
خالد: و انت صدقت اني بسير عند الربع الحين؟؟ بس كنت ابا اشرد ...
محمد: يا سلام عليك؟؟ جيه بياكلونك هم؟؟
خالد: حمود لا تبدا بالمحاظرات ... جنك ما كنت تسويها ...
محمد: عفا الله عما سلف ... و بعدين كنت ياهل ...

و هني نقع خالد من الضحك ...

خالد: ههههههههه ... بس بس الله يخليك ... اونه ياهل ...
محمد: ايه ... انتبه ع سواقتك مابي اموت ...
خالد: ههههههه انزين خلاص بسكت ...

و عقب فترة صمت ...

خالد: يالله عاد ما قلتلي وين تبا تسير؟؟
محمد: بسألك سؤال و اباك تجاوبني بصراحه ...
خالد اتفاجأ من سؤال محمد: اسأل ...
محمد: انته الين الحين ويا قوم عمر؟؟
خالد ما عرف بشو يرد عليه بس اضطر انه يجذب عليه: قاطعتهم من زمان ... قبل ماسافر ... ليش تسأل؟؟
محمد: ادريبك تبا تسير عندهم ... و انا ماقدر امنعك بس والله اذا لي معزه عندك و تباني ايوزك اختي لا تسيرلهم ... اعتقد انت تعرفهم اكثر عني ... و تعرف انا شو اقصد ...
خالد: من هالناحيه لا تحاتي ... قلتلك اني مقاطعنهم من زمان ... و كل شي عشان خاطر الشيخه أسما يهون ...
محمد: ان شاء الله ما تكون مجرد رمسه ...
خالد: افا تشك فيه و انا ولد خالتك ... ما هقيتها منك الصراحه ...
محمد: لا ما اشك فيك بس بعد الحرص واجب ... انزين و ناصر؟؟
خالد: حتى ناصر قاطعهم من زمان ...
محمد: زين تسوون ...

عقب ساعه من الحواطه في السياره محمد قال لخالد يسير عند واحد من ربعه و عزم عليه يتم بس خالد ما رضى ... محمد كان حاس انه خالد كان يجذب عليه بس ما حب يحرجه ... و كان واثق انه كل شي بيبين في وقته ...

*~*~*~~*~*~*

[أريج الورد]

%% السبت 8:45 الصبح %%

" خلاص اتفقنا على كل شي و تقدر تباشر في الشغل من باجر اذا تبا "

مايد: مشكور و ما تقصر يا سالم ...
سالم: افا عليك ما سوينا الا اللي علينا ...
مايد: والله مادري شو اقولك ... مفتشل منك الصراحه بس راشد الله يهداه تسرع ولا خذ رايي ...
سالم: ما عليه ... ترى الدراسه ما بقى عليها شي ... و تبا الصراحه احسلك تشتغل ... على الاقل تشغل وقتك شوي الين تبدا الدراسه ...
مايد: خلاص عيل مشكورين مره ثانيه و اجوفكم باجر ان شاء الله ... فمان الله ...
سالم: فمان الكريم ...

ظهر مايد عن سالم و هو مستانس و بنفس الوقت خايف من اللي صار اليوم ... فكرة انه يشتغل في شركة بو سالم مخوفتنه وايد ... خصوصاً انه ممكن يتلاقى ويا خالد و هالشي طبعاً مب في صالحه ... بس اللي ريحه اكثر انه ما جاف خالد اليوم و حمد ربه ع هالشي ...

اما سالم عقب ما ظهر عنه مايد شل كمن ملف وياه و ظهر من المكتب ...

سالم: عايشه لو سمحتي اباج تخلصين هالاوراق بسرعه و ترديلي اياهم في اقرب وقت ...
عايشه بارتباك: ان شاء الله ... نص ساعه و يكونن زاهبات ...
سالم: مشكوره ...

ظهر سالم من المكتب و عيون ايمان و سلمى تتبعه و من اختفى عنهن ردن يقرقرن ...

ايمان: اقول عويش؟؟
عايشه بدون نفس: خير؟؟
ايمان: شوي شوي عن تاكلينا يا بوج شو سوينا بج؟؟
عايشه: ما تجوفيني اشتغل؟؟ شو تبين؟؟
ايمان: ماشي بس عندي سؤال محيرني و اجابته عندج ...
عايشه: قولي شو عندج؟؟
ايمان: ما تلاحظين انه انتي الوحيده اللي سالم بنفسه اييب الاوراق الين عندج ... و نحن يطرشلنا الهندي؟؟
سلمى: صدج ما يستحي ...
عايشه: عيب عليكن ... انتو في الشركه و جي ترمسون عيل برع شو تقولون؟؟
سلمى: نحن ما يبنا شي من عندنا ... كل شي جفناه بعيونا ...
ايمان: ما عليج منها ... و جاوبيني على سؤالي ...
عايشه بضيج: تبين سيري سإليه بنفسج ... و بعدين هو بنفسه كان طالع اكيد قال بيوصل الاوراق بطريجه ...
ايمان بخبث: يا عيني ع البراءه ... لا تسوين روحج بريئه ... هالحركات معروفه ...

عايشه ما سوتلها سالفه و خلصت الاوراق اللي عندها و سارت تزقر الهندي يوديهن لسالم ...

سلمى: جان وديتيهن بنفسج؟؟ مب حلوه هو اييب الاوراق الين عندج و انتي تعطينهن الهندي يوصلهن ...
عايشه: لو سمحتي احترمي نفسج ... نحن في مكان شغل لا تخليني اقل ادبي عليج ...
سلمى: عدال يا ست الحسن ... اسمحيلنا الشيخه ع الرمسه اللي قلناها ...

تمت عايشه طول اليوم محرجه من الرمسه اللي سمعتها من ايمان و سلمى ... لهالدرجه الحقد عامنهم و هالشي خلاها تضايج و تكره اليوم اللي خلت فيه راشد يتوسطلها عشان الشغل ... بس بعد هالرمسه ما تهمها هي يايه تشتغل عشان تصرف على نفسها و اخوانها و ما عليها من حد دامها التزمت حدودها ...

*~*~*~~*~*~*

%% الساعه 10:30 الصبح %%

" رد للي طرشوك و قولهم رده للبيت مب راد "

منصور: ليش؟؟ عرست من وراها؟؟
عبدالله باستنكار: و انته شو يخصك؟؟ انت قولهم مب ياي و بس ...
منصور: يا بويه رد البيت و فكنا من الحشره ... حتى امايه قامت تشك من كثر اتصالاتها اللي ما توقف ...
عبدالله: محد قالك تعرضلها خدماتك ... اتحمل اللي بييك ... و سير جوف شغلك احسلك ...
منصور: انزين و ليلوه شو اقولها؟؟
عبدالله تأفف: قولها ما داومت اليوم ... مسافر ... أي شي ...
منصور تنهد: على راحتك بس اذا حشرتني مره ثانيه بخليها تحرسك عند باب الشركه ...
عبدالله خز منصور بعينه: منصور؟؟
منصور: لالالا خلاص مب قايلها ... اللي تباه بيصير ... فمان الله ...

ظهر منصور عن ابوه و ع ويهه مرسومه ابتسامة خبث ... عبدالله ما كان مقتنع انه منصور بيقص ع ليلى بسالفة سفره و شك انه ليلى متفقه وياه ع شي ...

عبدالله بخاطره: ما يندرابج يا ليلوه شو مسويه من وراي ... بس ما عليه لو تحرسين الشركه من اليوم الين باجر جوفي منو بيردلج ...

ظهر عبدالله من المكتب و طلب من السكرتيره تقول لاي حد يطلبه انه مسافر ...

*~*~*~~*~*~*

%% الساعه 4:30 العصر %%

اندق باب الحجره ع الخفيف الشي اللي قطع عليه حبل افكاره و خلاه يضطر يسمح للي يدق الباب انه يدخل ...

امل: غريبه؟؟ اليوم في البيت ...
ناصر: وين تبيني اسير يعني؟؟
امل: دوم محد ... و البيت مسونه فندق حق الاكل و النوم بس ...
ناصر: مالي نفس اظهر من البيت ...
امل استغربت من هدوء ناصر: انت متأكد انك ناصر اخويه؟؟ الصراحه ماصدق ...
ناصر: امول عن السخافه و ظهري ... خليني بروحي ...
امل يلست على طرف الشبريه: شو فيك؟؟ شي مضايجنك؟؟
ناصر: ولا شي ... بس ...
امل: بس شو؟؟
ناصر تنهد: كنت افكر ...
امل: شو؟؟ كلمات متقاطعه؟؟ ارمس عدل ...
ناصر: امول كف بييج ع ويهج ... عن السخافه ...
امل: هههههههههههههه ... هذا ناصر اللي اعرفه مب اللي من قبل شويه يرمسني ...
ناصر: ..................................................
امل: انزين بشو كنت تفكر؟؟
ناصر: بكل حد ... نحن ... ابويه ... امايه ... حتى خالي سعود ...
امل: هيه والله صدقك ... احس اني مفتقده خالي سعود وايد ... مب جنهم شبعو سفر؟؟
ناصر: و انا بعد افتقدته لدرجة اني ما افتقد ابويه الحين كثر ما انا مفتقد خالي ...
امل: الله يردهم بالسلامه ان شاء الله ...

و بعد فترة صمت ...

امل: و بعد ... قول اللي في خاطرك ... ليش سكت؟؟
ناصر افتر عنها ع الصوبه الثاني: بس خليني بروحي ... تعبان و ابا ارقد ...
امل: الحين عاد؟؟
ناصر: امول ظهري ... ما فيه ع حشرتج ...
امل: كيفك ...

ظهرت امل عن ناصر و هي مستغربه من تغيير ناصر المفاجيء ... مب ناصر الاولي اللي ما عليه من حد ...

امل في خاطرها: كل هذا شالنه في قلبك يا ناصر و نحن ما ندري ... اول مره احس انك حنون ... الله يهديك و يخليك جي دوم ...
*~*~*~~*~*~*

%% الاحد 5:00 العصر %%

في بيت بو محمد بالتحديد ... سلامه كانت في الصاله يالسه ويا حرمه كانت مسيره عليها ...

ام جاسم: ليلى شخبارها؟؟ ما ينسمع لها حس ...
سلامه: ليلى بخير و سهاله ... بس لاهيه ويا ريلها و عيالها ...
ام جاسم: الا على طاري ريلها ... هو عرس من عقبها؟؟
سلامه باستنكار: الله يهداج يا ام جاسم ... وين جفتيه عرس عليها؟؟ بالله عليج هاي رمسه؟؟
ام جاسم: جايفتنه بعيوني اللي بتاكلهن الدود ... كانت ويا وحده و وياهم بنت صغيره بعد ...
سلامه باستغراب: متى؟؟
ام جاسم: الله يسلمج من كمن يوم عزرن البنات الا ياخذني وياهن السنتر و جفته هناك ويا حرمه و وياهم بنت صغيره ...
سلامه: لالالا الظاهر انتي مشبهه عليه ... ولا وين بيعرس و بييب عيال و نحن ما ندري؟؟
ام جاسم: والله مادري يا ام محمد ... هاللي جفته ...
سلامه: اكيد مشبهه عليه ... و بعدين لو صار شي اكيد بندري ...
ام جاسم: خلاص عيل اترخص منج الحين ...
سلامه: وين توه الناس؟؟
ام جاسم: والله خاطري ايلس وياج بس البنيات في البيت رواحهن ماقدر اخليهن ...
سلامه: جان يبتيهن وياج؟؟
ام جاسم: مره ثانيه ان شاء الله ... فمان الله ...
سلامه: فمان الكريم ...

وصلت سلامه ام جاسم الين باب البيت و ردت داخل و هي تفكر بالرمسه اللي قالتها ام جاسم ... معقوله يكون عبدالله معرس على ليلى؟؟ و اذا كان معرس ليش ليلى ما خبرتهن؟؟ ولا ما تدري؟؟

سلامه بخاطرها: بتصل بشمسه بتخبرها ...

دقت سلامه رقم بيت بو سالم و شلته شمسه و عقب السلام ...

سلامه: اخبرج؟؟ عبدالله شخباره ويا ليلى؟؟
شمسه: الحمدلله ما يشكون باس ...
سلامه: ليلى ما قالتلج شي عن عبدالله؟؟
شمسه بقلق: شو بلاه عبدالله؟؟
سلامه: الله يسلمج ام جاسم ظهرت عني قبل شويه ....<<<< و خبرتها بالسالفه كلها ...
شمسه: اييج شور؟؟ ازهبي خلينا نسيرلها ... بمر عليج عقب شويه ...
سلامه: يالله اترياج ...

*~*~*~~*~*~*

%% الساعه 5:45 العصر %%

" بلاج واقفه ع راسي؟؟ نبا نرمس ع راحتنا "

عفرا: لاحقه عليها ... عطيني التلفون شويه ...
امل بضيج: لمنو بتتصلين؟؟
عفرا: ما يخصج ... عطيني التلفون و بس ...
امل تأففت بضيج: اقول ميثوه برد ارمسج عقب ... باي ... " و عقب ما سكرت التلفون " هاج ... خلصي بسرعه لو سمحتي ...

دقت عفرا الرقم و تمت تتريا فتره الين ردو عليها ...


|| على التلفون ||

عفرا: السلام عليج عموه ... منصور موجود؟؟
ام منصور بضيج: هاذوه بعطيج اياه ...
منصور بضيج عقب ما خذ التفلون عن امه: خير؟؟ شو تبين انتي الثانيه؟؟
عفرا: ليش تقص على امايه و تقولها انه ابويه ماداوم؟؟
منصور: ابوج يا حلوه مسافر ... هج من البلاد بسبتكم ... يالله مع السلامه ... >>>>>>> و سكر الخط في ويهها ...

امل: هههههههههههه ... سكر الخط بويهج؟؟
عفرا: الجلب شو يتحرى عمره هذا؟؟
امل: تستاهلين اللي ياج ... ييبي التلفون خليني اتصل بميثوه ...

عفرا ما خلتها تاخذ التلفون و ردت تتصل ...

امل تأففت: حق منو بعد؟؟
عفرا: ما يخصج ...
امل: يا حبج حق المذله ... لازم يسكرون ف ويهج عشان ترتاحين ...

و عقب فتره ...

ليلى: لمنو تتصلون؟؟
عفرا: اتصل بابويه ما يرد ...
ليلى: يرن ولا يعطيج مغلق؟؟
عفرا: يرن ...
ليلى: اجوف عطيني ...

تمن ليلى و عفرا يتصلن بعبدالله بس ما رد عليهن و آخر شي يأسن و ودرن التلفون ...

ليلى: انا بسير حجرتي اذا اتصل زقروني ...
عفرا: ان شاء الله ...
امل عقب ما سارت ليلى: بلاها امايه ... شكلها مب على بعضها ...
عفرا: زعلانه بسبة ابويه ...
امل: سبحان اللي يغير ولا يتغير ... شو جايسنهم هي و نصور انقلبو مره وحده؟؟
عفرا: هذا بدال ما تسيرين تواسينها و تخففين عنها شوي يالسه تطنزين عليها؟؟
امل: ما عليج ... هالحركات معروفه خلي ابويه يرد و هي بترد شرات قبل و اخس بعد ...
عفرا: ترمسين عنها جي جنها وحده من الشارع ولا جنها امج ...
امل و هي تنش من مكانها: سيري واسيها انتي جان تبين ...

سارت امل حجرتها و تمت عفرا في الصاله منقهره من تصرفات امل و ردت تتصل ببوها بس بعد ما رد عليها ... و شويه الا بدشة خالاتها شمسه و سلامه سلمت عليهن و سارت تزقر امها من الحجره ... خمس دقايق و دشت عليهن ليلى سلمت عليهن و يلست وياهن ...

شمسه: الا ريلج شحاله؟؟
ليلى اتفاجأت من سؤال شمسه: الحمدلله بخير ...
سلامه: وينه ما ينجاف؟؟
ليلى: متى تحيدنه يقر في البيت ... عبدالله مسافر ...
شمسه: متأكده ما سار هني ولا هناك؟؟
ليلى: تراني اقولج مسافر ...

تمن شمسه و سلامه يسولفن شوي ويا ليلى و ظهرو عنها بدون ما يخبرونها باللي قالتلهم اياه ام جاسم بسبة خوفهم من ردة فعلها خصوصاً انه شكلها تعبانه و خبر مثل هذا يمكن يخليها تعصب و هم ما لهم بارض ع المشاكل ...

*~*~*~~*~*~*

[أريج الورد]

%% الاربعا 6:00 العصر %%

في هالوقت في بيت بو سيف ... موزه كانت مسيره عليهم و وياها بو حمدان و حمدان يلسو في الميلس ويا بو سيف و سيف و موزه عقب ما سلمت على بو سيف يلست ويا ظبيه و البنات في الصاله ...

في الطرف الثاني من البيت ... عند الباب الخارجي بالتحديد ...

" جان قلتلي من قبل بتمر عليهم؟؟ جان جنبت نفسي مثل هالمواقف "

محمد: شو بيسووبك؟؟ بياكلونك؟؟ قلتلك بنسلم و بنظهر ... من زمان ما مريت عليهم ...
خالد: ياخي انته سخيف ... جان مريت عليهم في وقت ثاني؟؟ لازم تسحبني وياك؟؟
محمد: امش و عن الهذربان ...
خالد: بندش و امرنا لله ...

دشو محمد و خالد الميلس سلمو و يلسو و خالد طول الوقت عيونه ع سيف و سيف يحاول يتجاهله ...

خالد: شحالك عمي عساك بخير؟؟
بو سيف: دامك بخير نحن بخير و سهاله ...
خالد: عسى دوم ... " و التفت صوب سيف و قاله بخبث " و انته سيف شحالك و شو الشغل وياك؟؟
سيف: الحمدلله ... و الشغل ماشي حاله ...
خالد: هييه ياينكم قريب انا ... ما يصير اتم بليا شغل الحرمه اكيد تبا واحد يشتغل مب واحد بطالي ...
بو سيف: حياك يا ولدي ... الشركه شركتك ... مبروك يا ولدي و الله يهنيك ان شاء الله ...
خالد بغرور: الله يبارك فيك عمي ... و عقبال سيف ان شاء الله ...
محمد و هو يصاصر خالد: تراك فضحتنا ... مب وقتها هالرمسه ...
خالد بصوت واطي: و انا شو قلت؟؟
محمد: قوم قوم خلنا نسير ... غلطنا يوم يبناك ... " و التفت صوب عمه " يالله عمي نترخص منكم الحين ...
بو سيف: توه الناس ما وحالكم يلستو ...
محمد: لا بس يايين نسلم و نروح ... الربع يتريونا ...
بو سيف: برايكم مرخوصين ...
محمد: فمان الله ...
الكل: فمان الكريم ...

و عقب ما ظهرو محمد و خالد ... تم بو سيف يسولف ويا بو حمدان و حمدان و سيف رواحهم ...

حمدان لسيف: هذا خالد ما غيره؟؟
سيف بضيج: هيه هذا هو ...
حمدان: شو مشكلته هذا؟؟ ع الشو جايف نفسه؟؟
سيف: دومه جي متكبر و متعالي ع الناس ...
حمدان: هو بيعرس جريب؟؟
سيف بقهر: دام بنفسه قال اكيد ... ما استبعد هالشي ...
حمدان: اييك الشور؟؟ اخطب و توكل على الله و ان شاء الله بتيك اللي احسن منها ...
سيف: الله كريم ...

و في الطرف الثاني من البيت و بالتحديد حجرة جليثم ...

حمده: افتحي الدريشه و اعفدي ... مب احسن؟؟
جليثم: بسم الله من وين ظهرتي انتي؟؟
حمده: انا هني من اول ما شردتي عنا ... يوم اقول وراج شي جذبتيني ... لهالدرجه متولعه في بعض الناس؟؟
جليثم: شو تقصدين؟؟
حمده: اعرف هالحركات لا تيلسين تستهبلين ...
جليثم: الحمدلله ما سويت شي ...
حمده: ادري ما سويتي شي ... بس حسيت بج من يوم سرنا بيت قوم عموه ... ما حصلتي الا حمدان تحبينه؟؟ شو حياتج تحبين واحد دوم يعلق عليج؟؟
جليثم: هاك كان قبل ... الحين غير ... و بعدين كنا يهال اكيد بنطلع القاب على بعض ...
حمده: لا منو قالج الحين غير؟؟ الين الحين يقولج الطويله عاد انتي ما سمعتيه يوم سأل عنج اظن كنتي ويا منال في الحجره ...
جليثم بانفعال: الحمار هذا ما ينسى؟؟ خليني اجوفه والله لاصفعه ...
حمده: هههههههههه انزين اعصابج ... انا حمده مب حمدان هبيتي ف ويهي جي ...
جليثم: اسمج جريب من اسمه ...
حمده و هي تغايض جليثم: جفتي عاد؟؟ تخيلي اسمي و اسمه في بطاقة العرس بتطلع اوكي صح؟؟
جليثم فرت المخده ع ويه حمده: ظهري عني لا ارتكب فيج جريمه ...
حمده و هي متجهه صوب الباب: ههههههههههه انزين خلاص بظهر ... بس اذكري حمدااااان و حمده ...

ظهرت حمده من حجرة جليثم بسرعه قبل لا تيها مخده ثانيه ع ويهها و هي ناقعه من الضحك عكس جليثم اللي عصبت عليها و شويه و بترتكب فيها جريمه ...

و عقب ما ظهرت حمده عنها ردت تراقبهم من الدريشه عقب ما بندت الليتات عشان ما تبين لانه الظلام حل و اللي برع يقدرون يجوفون اللي داخل ...

*~*~*~~*~*~*

%% الساعه 8:30 فليل %%

" اففففف بلادكم حاره ما وحالنا وصلنا ذبنا من الحر "

ام سعود بحزم: نوروه يا مسودت الويه لبسي شيلتج اجوف ...
نوره: حر يدوه ماقدر استحمل ...
ام سعود: وابويه عليج انا؟؟ سعود جوف بنتك مسودت الويه خلها تلبس شيلتها ...
سعود: نوره لبسي شيلتج اجوف و عن الفضايح ...
شيخه (مرت سعود): نوره سمعي كلام يدتج يالله ...
نوره بضيج: اففففففففف ... انزيين ...
شهد: ابويه محد بيينا؟؟ ماجوف حد ياي يستقبلنا ...
سعود: محد بييج ... يالله اجوف جدامي ...

ظهرو قوم سعود من المطار خذو تكسي يوصلهم لفندق الين ينظفون البيت و طول الدرب شهد هي الوحيده اللي تهذرب ...

نوره بضيج: شهود تراج حشرتينا فكينا من الاسئله ...
شهد: جب انتي ... ارمس ابويه انا ... " و وجهت الكلام لبوها " انزين ابويه الحين محد يعرف انه نحن يينا؟؟
سعود بضيج: كم مره مجاوبنج ع هالسؤال؟؟ قلنا لاء ... محد يدري ...
شهد: انزين ليش؟؟
شيخه: شهد ... بس عاد اتأدبي و يلسي ساكته ...
شهد: اففففففففف انزين سكتنا ...
ام سعود: بس جي احسن ... حشى يابوج صدعتينا ...
نوره: ههههههههههه اونها زعلت ...
شهد بانفعال: جب انتي ...

و تمن شهد و نوره يتناقرن الين وصلو الفندق و ما فاد فيهم الهزاب اللي حصلو من ابوهم ...


*~*~*~ نهاية الجزء الخامس ~*~*~*

[أريج الورد]

*~*~*~ الجزء السادس ~*~*~*




%% الخميس 1:30 الظهر %%

" حياك الله بو عسكور ... اجوفك هناك عيل ... فمان الله " ... و سكر الخط ...

ام منصور: و الغدا؟؟
منصور و هو مجابل المنظره يتسفر: بتغدا ويا سعيد ربيعي ... من متى يحن عليه و انا استسمح منه عاد الحين حلف عليه الا اتغدى وياه ...
ام منصور: انزين اقولك ...
منصور: آمري ...
ام منصور: ليلوه شو سالفتها ويا بوك؟؟
منصور: الصراحه مادري ... ما خبروني شو صاير بينهم ... بس اللي اعرفه انه من فتره ظهر من البيت ولا رد ولا اتصل فيهم ...
ام منصور بحقد: تستاهل ما ياها ... ركضت وراه الين خذته مني و الحين بيراويها الويل ... احسن عشان تتعلم ما تصرق الرياييل مره ثانيه ...
منصور: انزين انا مب فاضي لهالسوالف ... مع السلامه ...
ام منصور: حافظنك الرب ...

ظهر منصور من حجرته و لحقته ام منصور سارت حجرتها ...

ام منصور بخاطرها: هذي حوباتي يا ليلوه ... اللي حصلتيه شويه ... عبدالله و انا اعرفه عدل هذا ويهي اذا ما كان معرس عليج ...

*~*~*~~*~*~*

%% عقب نص ساعه في المطعم %%

سعيد: وينك يا ريال ما تنجاف؟؟
منصور: تدري مشغول ويا الاهل و في الشركه ... و انتو شو اخباركم؟؟ مافي عرس جريب؟؟
سعيد باستنكار: لالالالا فال الله ولا فالك ... هالموضوع خلاص شلته من راسي ...
منصور بخبث: هههههههه ... و شو هالشي اللي مكرهنك في العرس هالكثر؟؟
سعيد و هو يطالع شاشة الموبايل اللي يرن: هالاشكال منو غيرهن؟؟
منصور: هههههههههه ... رد عليها ليش طنشتها؟؟
سعيد: هاي وحده ما تستاهل ... اقولك ما خلت واحد ما رمسته ... و المشكله اغلبهم ربعي و زاخنها كمن مره و بعد تحلف و تقول ماعرف حد غيرك ...
منصور: ياخي ودرها و فك عمرك من الصدعه ...
سعيد بخبث: لالالالا ما يصير ... خلنا نستفيد منها شوي و بعدين يصير خير ...
منصور و عينه ع الحرمه و الريال اللي دشو المطعم: هههههه ... هذا انته ما تتغير تستنزفهن الين يفلسن و عقب تقبضّهن الباب ...
سعيد و هو يتلفت حواليه الين لمح الريال و الحرمه: شو نسوي بعد ... انزين بس كلت الحرمه بثيابها ما تجوف ريلها وياها ...
منصور و هو ينش من مكانه: لحظه شوي ...
سعيد: تعال وين ساير؟؟
منصور: اتريا بييك ...

سار منصور صوب الريال و الحرمه و ابتسامة خبث مرسومه ع ويهه ...

منصور: ماشالله ماشالله ... مبروك منك المال و منها العيال ...
عبدالله بانفعال: الله لا يبارك فيك ... خير؟؟ شو تبا؟؟
منصور و عينه ع الحرمه: منو المدام؟؟
عبدالله: ما يخصك و لو سمحت فارج ...
منصور بخبث: توها ليلوه مسكره عني ... ارد اتصلبها و اخبرها باللي جفته؟؟
عبدالله: منصور خوز دام النفس عليك طيبه ...
منصور: ان شاء الله ... و اسمحولي ع الازعاج ... بس كنت ياي اباركلكم ...
عبدالله: ما يحتاي ...
منصور: مع السلامه يا مدام ... تشرفنا بشوفتج ...
عبدالله بصوت واطي عقب ما سار عنهم منصور: لا بارك الله فيك ولا في الساعه اللي ييت فيها ...
ميره بقلق: منو هذا؟؟
عبدالله: منصور ولدي ...
ميره تفاجأت: هذا منصور؟؟ يا ويلي عيل رحنا فيها ...
عبدالله: شو رحنا فيها انتي بعد؟؟
ميره: يقولك بيخبر مرتك و تباني استانس؟؟
عبدالله: ما عليج منه ... كلام بس اصلاً ما يقدر يسويها ...
ميره: الصراحه مب مطمنه ...
عبدالله: تبينا نغير المطعم؟؟
ميره: يكون احسن ... مب مرتاحه لوجوده هني ...
عبدالله: يالله نشي عيل ...

في الطرف الثاني من المطعم ...

سعيد: منو هاذيل؟؟
منصور: ابويه و مرته اليديده ... سواها و عرس عليها ... اسميها ليلوه بتتخبل اذا درت ...
سعيد باستغراب: منو ليلوه بعد؟؟
منصور: مرته الاوليه ...
سعيد: ماشالله ابوك كم مره في السنه يعرس؟؟
منصور: علمي علمك ... عاد مادري شو محصل من العرس ...
سعيد: الله يعينه الصراحه ...

خمس دقايق و يابو الاكل و تغدو و سولفو و ظهرو ...

*~*~*~~*~*~*

%% الساعه 5:30 العصر %%

" وين كنتي حضرتج؟؟ "

نوره ببرود: كنت اتمشى ...
شيخه بانفعال: بروحج؟؟
نوره: هيه بروحي ... شو يعني؟؟
شيخه: لا والله؟؟ و تقولينها بكل برود؟؟
نوره: يالسين في الغرفه طفرانين شو نسوي يعني؟؟ و تعرفيني ماحب الحكره ...
شيخه: ما فيج تتريين نص ساعه الين نرد البيت؟؟
سعود: شو بلاكم؟؟ اصواتكم واصله لين آخر الفندق ...
شيخه: بنتك ظاهره من الغرفه روحها و سايره تتمشى ...
سعود: نوره نحن شو قلنا؟؟
نوره: انزين خلاص آخر مره ...
سعود: مره ثانيه اذا بغيت تظهرين استإذني ...
نوره: ان شاء الله ...
سعود: يالله زهبو اغراضكم خلهم ينزلونهن ... الحين بنسير البيت ...
نوره: افففففف اخيراً ...

*~*~*~~*~*~*

%% الساعه 6:15 العصر %%

" ما صارت حاله هذي؟؟ الين متى بنتم محبوسين في البيت؟؟ "

ليلى: يوم بيرد ابوج تفاهمي وياه ... و بعدين هذي اختج يالسه في البيت ما قالت شي اشمعنى انتي اللي دوم ملانه؟؟
امل: شو اسوي اذا بنتج عديمة احساس ...
ليلى بهدوء: امل سمعيني ... الظهرات الوايده مب زينه ... شو تبين الناس يقولون عنج؟؟
امل: و الناس شو يخصهم فيني؟؟ جنهم ما يظهرون بالمره ...
ليلى: يظهرون ... بس مب هالكثر ...
امل: جوفي عاد ... لا تيلسين تسوين روحج مهتمه ... اونج يوم شردتي ابويه من البيت قلتي بتصطلبين ... هالحركات مب عليه و بظهر يعني بظهر ...
ليلى بانفعال: امول؟؟ عيب عليج انا امج مب ربيعتج جي ترمسيني ...
امل: حتى ربيعتي احترمها اكثر منج ... انتي ولا شي بالنسبه لي ...

ليلى انصدمت من اللي قالته امل و انربط لسانها ما قدرت ترد عليها ... على عكس امل اللي ولا جنها ما قالت شي سارت حجرتها بالها مرتاح و اتصلت بميثا عشان تمر عليها ...


|| في حجرة امل ||

عفرا: شو هالرمسه اللي قلتيها لامايه؟؟ مب عيب عليج؟؟
امل: صخي انتي الثانيه مب فاضيه لسخافاتج ...
عفرا: امول متى بتفهمين انه امايه تغيرت؟؟ صدقيني هي تحترق يوم تجوفكم تسوون فيها جي ... كفايه ابويه اللي الين الحين ما رد بعد انتو تيون تزيدونها؟؟
امل: عقب شو عاد قامت تحس؟؟ يوم كنا نحتاجها ما حست فينا ... الحين حست؟؟
عفرا: بعده ما فات الاوان بس انتي توهمين نفسج بهالشي ...
امل بانفعال: انا ما اوهم نفسي بشي و اذا قلبج يعورج عليها سيري يلسي وياها و فكينا من صدعتج ...
عفرا: بسيرلها بس ماقول الا الله يسامحج ...
امل: و يسامحها ع اللي سوته بعمرها و فينا ...

ظهرت عفرا من عند امل بدون ما ترد عليها و هي قلبها يعورها على امها اللي مب محصله حد يفهمها ...

*~*~*~~*~*~*

%% الساعه 11:45 فليل %%

" ههههههههه ... اسميك ياهل ... تخاف من حمود عاد؟؟ والله ما عندك سالفه "

خالد بانفعال: و بعدين انا ما خفت منه ... بس ما فيه على صدعته ...
عمر: عادي خله يحتشر من اليوم الين باجر ... انا لو منك بقوله كل شي ولا بهتم للي بيقوله ...
ناصر: صدقه محمد ... نحن لازم نودر هالسوالف الين متى بنتم جي؟؟

انصدمو خالد و عمر من رمسة ناصر و بانت ملامح الصدمه على ويوههم ...

عمر و هو يتهيس يبهت ناصر: نصور شو بلاك؟؟ مصخن؟؟
ناصر: لا مصخن ولا شي ...
خالد: لالالالالا الظاهر انته مب طبيعي اليوم ... يمكن عندك نقص في هاك الشي ...
عمر: ههههههه ... ما عليه ولا تزعل ... باجر ان شاء الله بتحصل كل شي زاهب ... تعرف آخر الشهر فقر ... باجر من ينزل المعاش بييبلك و على حسابي بعد ...
ناصر: تطنزون حضراتكم؟؟
خالد: نصور شو فيك؟؟
ناصر: ما فيه شي ...
خالد: اكيد؟؟ ترى شكلك مول مب عايبني ...
ناصر: مب لازم يعيبك ... عن اذنكم ...
عمر: تعال وين ساير؟؟ بعدها السهره ما بدت ...
ناصر و هو متجه صوب الباب: سهرو رواحكم ... مع السلامه ...
خالد: كيفك انته الخسران ...
عمر: شو بلاه ولد خالتك؟؟
خالد: ما عليك منه ... اليلسه بليا هاك الشي مب شي ... زهق من ويهك و ظهر ...
عمر: هههههههههه ... شكله جي ... باجر بيعتدل المود و بيرد شرات قبل و احسن ...

*~*~*~~*~*~*

%% السبت 9:30 الصبح %%

" صباح الخير "

شمسه باستغراب: صباح النور ...
مريم: غريبه اليوم ناش من وقت؟؟ و بعد كاشخ وين ساير ماشالله؟؟
خالد: ساير الشركه ... عندج مانع؟؟
شمسه بوناسه: زين زين اخيراً قررت تودر عنك الهيازه ...
خالد: بس بجوف الوضع كيف هناك و برد ... و اذا حبيت المكان بيلس ...
شمسه: وايد عليك ... الا شركة ابوك هاي كيف يعيبك الوضع ولا ما يعيبك؟؟
خالد: بعد ... تعرفين منو هناك ما يحتاي اقولج ...
شمسه: يعني بتخليلهم الشركه يلعبون فيها ع راحتهم و انته ميلس في البيت؟؟
خالد بخبث: اكيد لاء ... بس لاحقين ع الكراف ...
شمسه: تريقت؟؟
خالد: الحين بسير اتريق و بظهر ...
شمسه: برايك ...

سار خالد يتريا قبل ما يظهر و عقب ما خلص من الريوق توجه على للشركه ...

*~*~*~~*~*~*

[أريج الورد]

%% الساعه 10:30 الصبح %%

" مشكور و ما قصرت ... ماشالله عليك شغلك تمام و ما عليه كلام ... "

مايد: لا شكر على واجب ... هذا شغلي و اللي لازم اسويه ما زدت بشي عن باقي الموظفين ...
سالم: بالعكس انت انشط واحد فيهم هذا اللي لاحظته فيك ...
مايد: مشكور و ما قصرت ...
سالم: خلاص تقدر تتفضل الحين ...
مايد ان شاء الله ... عن اذنك ...

ظهر مايد من مكتب سالم و هو مرتاح لارتياح سالم من شغله و هالشي اللي خلاه يستانس ...

" الصراحه ما عرف كيف اردلك جميلك يا راشد يوم دبرتلي هالشغله ... ما كنت حاط ببالي اني ممكن اكون مرتاح لهالدرجه ... بس بعد بيتم شي دوم مكدر مزاجي و مخوفني على طول ........... "

في طريجه للمكتب تفاجأ بواحد اصطدم فيه فجأه بدون قصد و خلا افكاره تتلاشى ...

خالد بضيج: عمى ... شو ما تجوف جدامك انته؟؟
مايد باترباك: اسمحلي ما جفتك ... كنت .......
خالد قاطعه: يا بابا صحصح ... انته في مكان شغل مب في البيت عشان تسرح ... ولا ماخذ شي قبل لا تيي؟؟
مايد انصدم من رمسة خالد بس رد استسمح منه و هو مرتبك: السموحه ... و ان شاء الله آخر مره ...
خالد بضيج: سير جوف شغلك احسلك ...

سار مايد عن خالد و هو منحرج من تصرف خالد وياه الشي اللي خلاه يمشي و هو مب قادر يرفع راسه من الحرج ...

سالم من سمعهم محتشرين برع المكتب عرف خالد من صوته و ظهر يجوف شو السالفه ...

سالم: شو بلاكم؟؟
خالد: تعال وياي مكتبك شويه ...
سالم: شو عندك؟؟
خالد: انته تعال و بس ...
سالم: اتفضل ...

في مكتب سالم ...

سالم: شو سبب الزياره المفاجأه؟؟
خالد: شركة ابويه كيفي ايي متى ما ابا ... حرام؟؟
سالم: لا مب حرام ... بس مستغرب نشتك من الصبح ...
خالد: لا تستغرب من هالشي ... كلها كمن يوم و بباشر الشغل ان شاء الله ...
سالم: ههههههه ... مبروك ما بغيت ياخي ...
خالد: شو نسوي؟؟ من الملل ... الا هذا شو يسوي هني؟؟
سالم: منو؟؟
خالد: هذا راعي المخدرات المحترم ...
سالم باستغراب: راعي المخدرات؟؟ منو تقصد؟؟
خالد: ميود منو غيره ...
سالم: مايد اخو راشد؟؟
خالد: منو غيره ...
سالم: من صدقك انته؟؟ الريال مافيه شي و ماشالله عليه نشيط و ملتزم بشغله ولا جفنا عليه غلط ... و الا انته لك راي ثاني؟؟
خالد ابتسم باستهزاء: جنه المسرحيه مشت عليكم انته و ابويه ... اجوف الكل قام يلعب عليكم ... اول ......
سالم قاطعه: خالد لو سمحت لا تدخل في شي ما يخصك فيه ... لا حد لعب علينا ولا يقدرون اصلاً ... و انت تدري انه اللي تقصدهم لولاهم ما كانت الشركه بتقوم ...
خالد: الظاهر انته مخك مغسول عدل شرات ابويه ...
سالم: محد مغسول مخه غيرك انته ...
خالد بخبث: شو قصدك؟؟
سالم: ولا شي ...
خالد: انته الظاهر الكلام وياك ضايع ... اسير لبويه احسن من مجابلة ويهك ...
سالم: لا اتعب روحك ابويه محد ...

ظهر خالد من مكتب سالم و حصل ابوه ف ويهه ياي من برع و وياه و بو سيف ...

عقب السلام ...

بو سالم: ما بغيت تينا يابوك ... من متى و نحن نترياك؟؟
خالد: مادريت انكم ما تصبرون عني لهالدرجه جان ييتكم من زمان ...
بو سيف: حياك الله في أي وقت يا ولدي ... الحلال حلالك ...
خالد بخبث: ادري ...

بو سالم عرف اللي يدور ببال خالد و خزه بنظره عشان يسكت ...

خالد: عيل سيف وينه؟؟ بسلم عليه ...
بو سالم: بتحصله هناك في مكتبه ... <<<<< و أشرله ع مكان مكتب سيف ...

%% في مكتب سيف %%

سيف في هالوقت كان مندمج ويا الاوراق اللي جدامه و ما انتبه للي دش عليه و سلم و انصدم يوم جاف خالد جدامه و هد شغله ...

خالد من طرف خشمه: شحالك سيف شو الشغل وياك؟؟
سيف: الحمدلله تمام ... و انته شحالك؟؟
خالد: الحمدلله ...
سيف: ماشالله اليوم زايرنا؟؟
خالد: نطمن ع الحلال ... و لا تنسى تراني جريب بشتغل هني ... تدري ما يصير اعرس و انا بليا شغل لازم نكد ع الحرمه ...
سيف حس بدقات قلبه تتسارع: تستاهل ... الله يهنيك ...
خالد باستهزاء: بس؟؟ هذا اللي طلع منك؟؟ ما دريت انك بتحقد عليه لهالدرجه ...
سيف: لا حقدت عليك ولا الله قاله ...
خالد بخبث: يعني افهم من كلامك انك خلاص استسلمت؟؟
سيف: نحن مب في حرب عشان استسلم ولا انتصر ...
خالد: ههه